Raipur : हमर राम,शबरी के राम, कौशल्या के राम, वनवासी मन के राम अउ हम सबके भांचा : मुख्यमंत्री भूपेश बघेल

जय जोहार। श्रीराम ह हमर मन के भांजा हे, हमर मन के राम शबरी के राम हे, माता कौशल्या के राम हे, वनवासी के राम हे, हमर मन के पवित्र ग्रंथ म श्रीराम के जइसन छबि बनत हे, हमर मन के राम वइसे हे। हमन ह संत महात्मा के अनुकरण करत भगवान श्रीराम ल वैसे ही चित्रित कर हमेशा ओखर आदर्श म चलत हुए महात्मा गांधी के दिखाए राम राज्य के आदर्श बर काम करत रहना हे। मुख्यमंत्री भूपेश बघेल ह ये बात चंदखुरी म आयोजित माता कौशल्या महोत्सव के समापन अवसर म कहीन।

सीएम श्री बघेल ह किहीन कि हमन ह अपन सबो धरोहर ल राष्ट्रीय मानचित्र म स्थापित करे के परयास करत हन। हमन ह राजिम के माघी पुन्नी मेला के आयोजन ल व्यवस्थित स्वरूप दे के काम करत हन । राजिम के मेला स्थल के व्यवस्थित विकास बर अधोसंरचना ल तईयार करत हन। वोहा किहीन कि छत्तीसगढ़ ह भगवान श्रीराम के ननिहाल हे अउ वे हमर मन के भांजा हे. एखर सेती हमर प्रदेश में परंपरा रहे हे कि हम अपने भांजा के चरण स्पर्श करत हन।

सीएम ह करीन मानस मंडली ल सम्मानित

इस अवसर म मुख्यमंत्री ह महोत्सव में उत्कृष्ट प्रस्तुति देवइया विभिन्न मानस मंडली ल सम्मानित करीन । कार्यक्रम ल पर्यटन मंत्री ताम्रध्वज साहू अउ नगरीय प्रशासन मंत्री डॉ. शिवकुमार डहरिया ह घलो संबोधित करीन । ए अवसर म विधायक पारसनाथ राजवाड़े, छत्तीसगढ़ खनिज निगम के अध्यक्ष गिरीश देवांगन, गौ सेवा आयोग के अध्यक्ष महंत रामसुंदर दास समेत श्रद्धालु उपस्थित रिहीन ।

पद्मश्री कैलाश खेर ह दीन प्रस्तुति

प्रसिद्ध गायक अउ पद्मश्री सम्मान ले सम्मानित कैलाश खेर ह किहीन कि चंदखुरी के कौशल्या धाम ल मुख्यमंत्री के परयास ले वैश्विक पहचान मिले हे । वोहा माता कौशल्या मंदिर ल भव्य रूप दे के अउ महोत्सव के आयोजन बर मुख्यमंत्री के परयास के सराहना करीन । वोहा किहीन कि मुख्यमंत्री के पहल अउ परयास ले विश्व स्तर म कौशल्या धाम ल भगवान श्रीराम के ननिहाल के रूप म पहचान मिले हे । छतीसगढ़ के धरा अउ मनखे मन ह धन्य हे , जेमन ल माता कौशल्या अउ भगवान राम दूनों के आशीर्वाद एक संग मिलत हे । गायक श्री खेर ह समापन अवसर म भक्तिमय गीत के शानदार प्रस्तुति दीन।