अब 2500 रुपिया म होवत हे धान खरीदी ….. पहिली ले बेच चुके धान के अंतर रासि बैंक खाता मन आना सुरू….

रायपुर। कांग्रेस के राष्ट्रीय अध्यक्ष राहुल गांधी के छत्तीसगढ़ आगमन ह किसान मन बर  बड़ सउगात लेके आइस हे।  जनघोसना पत्र म करेगे वादा ल निभाए बर भूपेश सरकार ह  किसान मन ले 2500 रुपिया म प्रति क्विंटल के दर ले धान के भुगतान करना सुरु कर दिस हे।  आज बैंक खुलत ही प्रदेस के  हजारों  किसान मन के खाता म धान के मूल्य के बकाया रासि आना सुरु हो गेहे।  एखर  पहिली किसान मन के धान ल 2050 रुपये प्रति क्विंटल के हिसाब ले रासि के भुगतान करे जात रहिस हे, लेकिन आज 450 रुपिया प्रति क्विंटल के हिसाब ले किसान मन के बकाया रासि के भुगतान करे जात हे।

प्रदेस के अलग-अलग इलाका के किसान मन के खाता म रासि आए के खबर आवत हे।  जेखर ले किसान मन के चेहरा मन ह खुसी ले दूगुना हो गेहे।  किसान मन ह सरकार के ए कदम के सराहना करत हुए मुख्यमंत्री भूपेश बघेल के प्रति आभार व्यक्त करिन हे।  भूपेश सरकार से जुड़े आला सूत्र मन ह  बताइस के,  सोमवार ले  सहकारी समिति मन म  धान बेचइया किसान मन ल सोझे 2500 रुपिया  प्रति क्विंटल के दर ले भुगतान करे के प्रक्रिया घलो सुनिश्चित कर दे गेहे।  मतलब  सोमवार ले किसान मन ह धान बेचत हे तव उमन ल पूरा 2500 रुपिया प्रति क्विंटल के हिसाब ले भुगतान करे जात हे।

निश्चित तउर म प्रदेस के किसान मन बर बड़  तोहफा हे। काबर के धान म समर्थन मूल्य बढ़ाए के मांग अउ एखर उपर बहस पाछू के  कई बरस ले  होवत हे, लेकिन कांग्रेस के सरकार बनत ही सरकार ह दू घंटा के भीतर करजा माफी अउ धान के समर्थन मूल्य 2500 रुपिया करे के अपन वादा ल पूरा करिस हे। 17 दिसंबर के सपथ ले  के तुरंत बाद मुख्यमंत्री भूपेश बघेल ह कैबिनेट के पहिली बइठक म किसान मन के हित ले जुड़े ए दू प्रमुख वादा मन ल पूरा कर करिस। जेमा बकाया 450 रुपिया के भुगतान कर के भूपेश सरकार ह किसान मन के संका ल दूर कर दिस।