Chhattisgarh: म किसान मन ले समर्थन मूल्य म धान खरीदी हो गे सुरू, खाद्य मंत्री ह कुम्हारी म पूजा-अर्चना कर करिन शुभारंभ
जय जोहार…. (Chhattisgarh) प्रदेश भर म आज ले किसान मन ले समर्थन मूल्य म धान खरीदी ह सुरू हो गे हे। खाद्य मंत्री अमरजीत भगत ह रायपुर जिला के विकासखण्ड धरसींवा के ग्राम कुम्हारी म पूजा-अर्चना कर धान खरीदी के शुभारंभ करिन। ए दौरान मंत्री भगत ह ग्राम कुम्हारी म खाद्य गोदाम निर्माण के भूमिपूजन घलो करे हे।
ए अवसर म खाद्य मंत्री श्री भगत ह कहिन कि पूरा प्रदेश म आज ले धान खरीदी सुरू हो गे हे। राज्य के सबो 2305 खरीदी केंद्र म आवश्यक तैयारी पूरा कर ले गे हे। (Chhattisgarh) सबो खरीदी केंद्र म कोरोना संक्रमण के सुरक्षा बर सेनेटाइजर, मास्क अऊ हाथ धुलाई के व्यवस्था करे गे हे।
वो हा कहिन कि किसान मन ल कोनो प्रकार के परेशानी नई होही। खरीफ विपणन वर्ष 2020-21 म 21 लाख 29 हजार 764 किसान मन ह धान बेचे बर पंजीयन कराइस। गत वर्ष 19 लाख 55 हजार 541 किसान मन ह पंजीयन कराये रिहिस। (Chhattisgarh) ए वर्ष किसान मन के संख्या अऊ धान के रकबा म बढोत्तरी ल देखत हुये गत वर्ष के तुलना म जादा धान खरीदी होय के अनुमान हे।
ए मऊका म धरसींवा विधायक अनिता योगेन्द्र शर्मा, जिला पंचायत अध्यक्ष डोमेश्वरी वर्मा, सदस्य हरिशंकर निषाद, जनपद सदस्य धरसींवा योगिता ईश्वर निषाद, कुम्हारी के सरपंच शिवकुमारी बालाराम पाठक, कुम्हारी समिति के अध्यक्ष चंद्रशेखर शुक्ला समेत जनप्रतिनिधि अऊ बड़े संख्या म किसान ह मौजूद रिहिन।
