नई दिल्ली/ रायपुर। चुनाव के मउसम आवइया हे। किसान मन ले सौगात देवत हुए केंद्र सरकार ह धान के समर्थन मूल्य म 200 रुपिया प्रति क्विंटल बढ़ा दिस हे। येकर ले देश के संगे-संग छत्तीसगढ़ के लाखों किसान मन ल येकर फायदा होही। सरकार रागी के घलो समर्थन मूल्य ल बढ़ा सकत हे।
मंगलवार प्रधानमंत्री के केंद्रीय कृषि मंत्री राधा मोहन सिंह अउ नीति आयोग के सदस्य मन ले मुलाकात होइस हे। पीएम के संग होय ये बइठक म धान के समर्थन मूल्य ल लेके चर्चा होय रिहिस हे। अभु 1550 रुपिया सामान्य ग्रेड के धान के कीमत हे, जेला अब बढ़के 1750 रुपिया हो जाही।
बात अगर छत्तीसगढ़ के करिन त चुनावी घोषणा-पत्र म रमन सिंह ह 2100 रुपिया धान के समर्थन मूल्य करे के वादा करे रहिन हे। सरकार इला लेके विपक्ष के निशाना म घलो रहे रिहिस हे। ये बछर के अंत म छत्तीसगढ़, मध्य प्रदेश अउ राजस्थान म चुनाव होवइया हे। मोदी सरकार अइसे म ऐलान कर के मास्टर स्ट्रोक लगाय के कोसिस करत हे।