कांकेर। कोंडागांव जाय वाले राष्ट्रीय राजमार्ग म फरसगांव के नजदीक शनिवार देर रात करीब दू बजे बस अउ स्कॉर्पियो में टक्कर हो गे। ये दरदनाक हादसा म जगदलपुर के 3 झन युवा मन के मउत हो गे अउ तीन घायल हो गे, जेमा दू झन के हालत गंभीर हे।

अइसन जानकारी मिले हाबय कि सब्बो झन युवक मन ह एक स्कॉर्पियो म अपन एक दोस्त के बिहाव म शामिल होय बर कोरबा जात रिहिस हे। इही दउरान फरसगांव के पास ओखर स्कॉर्पियो ह एक यात्री बस ले टकरा गे। टक्कर अतेक जबरदस्त रिहिस की तीन झन युवक मन के उहे मउत हो गे। गंभीर रूप ले घायल अन्य दू झन स्कॉर्पियो सवार ल ईलाज बर रायपुर भेजे गे हे, उही हादसा म घायल एक झन व्यक्ति के इलाज फरसगांव म चलत हे।

फरसगांव थाना प्रभारी विनोद साहू ह बतइस कि महिंद्रा बस (सीजी 19 एफ 0288) यात्री मन ल रायपुर ले बीजापुर लेके जात रिहिस। रात 2 बजे के करीब ये बस ह फरसगांव म चिचारीनाला के नजदीक जगदलपुर ले कोरबा जात रिहिन स्कॉर्पियो ले टकरा गे। ये हादसा म जगदलपुर के रहईया सतीश राव, पिंकू चौहान, मनोज कुमार के मौके म ही मउत हो गे स्कॉर्पियो सवार टीनू टेकाम, कुलमन के गंभीर हालत ल देख के इलाज बर रायपुर भेजे हे। एक अन्य घायल रितेश पटेल के उपचार फरसगांव म चलत हे।