Raipur : इंडोनेशिया अउ मलेशिया के पॉम अब छत्तीसगढ़ म होवत हे लोकप्रिय

जय जोहार। (Raipur ) इंडोनेशिया अउ मलेशिया म पॉम के खेती ल बड़का पैमाना करे जात हे। एखर ले प्राप्त होवइया पॉम ऑयल खाद्य तेल के रूप म इस्तेमाल करे जात हे। छत्तीसगढ़ के भौगोलिक स्थिति अउ जलवायु ह पाम के खेती बर उपयुक्त हे । राज्य म एखर खेती के विपुल संभावना ल देखत हुए एखर खेती ल बढ़ावा दे जात हे ।

(Raipur ) पॉम ऑयल के खाद्य तेल के आलावा ये कास्मेटिक उत्पाद बनाय बर घलो उपयोग करे जात हे। अभी तक हमर मन के देस म पॉम ऑयल विदेस ले आयात करे जात हे। बीते कुछु बछर म हमर देस म एखर खेती होवत हे । छत्तीसगढ़ म एखर अच्छा संभावना हे , एला देखत हुए उद्यानिकी विभाग डहार ले पॉम ऑयल के खेती म फोकस करे जात हे । एखर ले फसल विविधिकरण के संगेसंग किसान मन के आमदनी बढ़ाय म मदद मिलही।

(Raipur ) छत्तीसगढ़ के जलवायु एखर खेती बर अनुकूल होय के सेती महासमुंद, बालोद, कोरबा, कांकेर क्षेत्र म एखर खेती करे जात हे। राज्य म पॉम ऑयल के खेती 7187 हेक्टेयर म करे जात हे अउ एखर रकबा सरलग बढ़त जात हे । वर्तमान म छत्तीसगढ़ म 467.65 मिटरिक टन पॉम ऑयल के उत्पादन होत हे ।