chhattisgarh: सिरपुर महोत्सव के संसदीय सचिव ह करीन सुभारंभ, किहीन – महोत्सव ह लोक कला अउ संस्कृति के हे संगम
जय जोहार…. (chhattisgarh) ऐतिहासिक स्थल सिरपुर म माघ पूर्णिमा के अवसर म होवइया दू दिनी सिरपुर महोत्सव के बुधवार संझा संसदीय सचिव अउ विधायक विनोद चंद्राकर ह दीप प्रज्ज्वलित कर कारीकरम के सुभारंभ करीन। ए अवसर म संसदीय सचिव अउ विधायक विनोद चंद्राकर ह किहीन कि कमती संसाधन होय के बावजूद घलो ये महोत्सव ह आधुनिकता के दउर म अपन प्राचीन संस्कृति अउ भव्यता ल बनाये हुये हे । वो हा किहीन कि महोत्सव ह संस्कृति अउ परम्परा के हिस्सा हे । इहां के मनखे मन ह पुराना परम्परा ल बनाये रखे अउ ओला संरक्षण देवत हे।
वो हा किहीन कि मनखे मन ल ख़ासकर युवा पीढ़ी ल इहां के बौद्ध विरासत, लोककला अउ संस्कृति ल जाने के अवसर मिलत हे । सिरपुर ह मनखे मन के आस्था अउ श्रद्धा के केन्द्र है। दूरिया-दूरिया ले मनखे मन ह इहां आके अपन कला के प्रदर्सन करत हे अउ ए महोत्सव म व्यापारी जरूरत के सामग्री के क्रय घलो करत हे ।
(chhattisgarh) संसदीय सचिव एवं विधायक विनोद चंद्राकर ह किहीन कि अइसे आयोजन ले क्षेत्रीय लोककला अउ संस्कृति ल मनखे मन ल देखे ल मिलत हे अउ आज के युवा ल संस्कृति के बारे म जाने अउ ओखर ले जुड़े के अवसर मिलत हे । आधुनिकता के दउर म अपन पुराना संस्कृति ल बनाये रखना हमन सबो के जिम्मेदारी हे । वो हा किहीन कि मेला आयोजक मन ह लईका मन के मनोरंजन के घलो ध्यान रखे हे । इहां आने आने प्रकार के खेल के आलावा झूला घलो लगीन हे, जेखर लईका मन ह आनंद लेवत हे। ए अवसर म कलेक्टर निलेश कुमार क्षीरसागर ह स्वागत भाषण दीन अउ अतिथि मन ल स्मृति चिन्ह प्रदान करीन । पुलिस अधीक्षक विवेक शुक्ला, मुख्य कार्यपालन अधिकारी ज़िला पंचायत एस.आलोक ह मुख्य अतिथि के स्वागत करीन ।
ए दउरान जिला पंचायत उपाध्यक्ष लक्ष्मण पटेल, स्काउट गाइड के जिलाध्यक्ष दाऊलाल चन्द्राकर, मध्य क्षेत्र आदिवासी प्राधिकरण के सदस्य मोहित ध्रुव, जिला पंचायत सदस्य अरूण अमर चंद्राकर ह घलो संबोधित करीन । ए अवसर म स्थानीय जनपद सदस्य, सरपंच ग्राम पंचायत सिरपुर ललित ध्रुव समेत जनप्रतिनिधि, गणमान्य नागरिक मन उपस्थित रिहिन ।
महोत्सव म ग्राम मुड़ियाडीह के स्थानीय कलाकार मन डहार ले सत्य के विरासत पंथी नृत्य, महासमुंद के दिशा नाट्य मंच डहार ले लेड़गा अउ डेडगा के बोझा नाटक, लहंगर के स्थानीय कलाकार मन डहार ले कृष्ण बलराम राऊत नाचा, खट्टी के स्कूली छात्रा मन डहार ले कर्मा नृत्य के प्रस्तुति दे गीस । सुभारंभ के बाद एकल कत्थक नृत्य अनंदिता तिवारी अउ लोक छाया रईपुर डहार ले प्रस्तुति दे गीस । मुख्य अतिथि ह कलाकार मन ल सम्मानित करीन।
