मुख्यमंत्री के निर्देस के बाद पत्थलगाँव – कुनकुरी सड़क सुधार में आई तेजी

बलरामपुर में सुशासन तिहार के बैठक में मुख्यमंत्री ह जताए रहिन भारी नाराजगी

राष्ट्रीय राजमार्ग के कार्यपालन अभियंता ला सड़क मरम्मत होवत तक कुनकुरी में मुख्यालय बनाए के दीन निर्देस

“बरसात ले पहिली रद्दा सुग्घर बनाए ऊपर जोर”

रायपुर . मुख्यमंत्री विष्णु देव साय के कड़ा निर्देस के बाद पत्थलगाँव ले कुनकुरी के बीच अधुरा सड़क के मरम्मत काम में अब तेजी आई हे। बीते दिन बलरामपुर में सरगुजा संभाग के निर्माण काम के समीक्षा बैठक में मुख्यमंत्री विष्णु देव साय ह ए सड़क के खराब हालत अउ मरम्मत में होवत ढील ला देख के भारी नाराजगी जताए रहिन।

मुख्यमंत्री ह साफ-साफ कहिन कि अधुरा सड़क के सेती आम मनखे ला आवय-जाय में भारी दुख होवत हे अउ आगू आवे वाला बरसात ला देखत ए रद्दा के तुरते सुधार बहुत जरूरी हे। एकर बाद विभाग कोती ले तुरते कार्रवाई सुरू करत मरम्मत काम ला पहिली नंबर में रखे गे हे।

सासन के प्रमुख अभियंता लोक निर्माण विभाग कोती ले जारी चिट्ठी के मुताबिक, पत्थलगाँव–कुनकुरी मारग के अधुरा हिस्सा के मरम्मत बर पहिली भेजे गे प्रस्ताव ला मंजूरी देवत काम तुरते सुरू करे के निर्देस दे गे हे। मरम्मत काम ला जोनल एजेंसी के माध्यम ले जल्दी सुरू करे जाही। यदि जोनल एजेंसी नइ मिलही, त संभाग के पुराना अनुबंध के तहत घलो काम कराए जा सकही।

एकर संग ही लोक निर्माण विभाग राष्ट्रीय राजमार्ग के कार्यपालन अभियंता अंबिकापुर ला निर्देस दे गे हे कि ओमन मरम्मत काम पूरा होवत तक अपन मुख्यालय कुनकुरी में बनाइन, ताकि काम के लगातार निगरानी अउ तुरते निपटारा हो सकय। बिना अनुमति मुख्यालय नई छोड़े के घलो निर्देस दे गे हे, जेखर ले काम में कोनो किसम के लापरवाही झन होवय। मुख्यमंत्री श्री साय ह ए काम ला बहुत गंभीरता ले लेवत साफ कहिन कि सड़क मरम्मत में कोनो भी किसम के ढील बरदास नई करे जाय। ए पहल ले न केवल आवय-जाय सुग्घर होही, बल्कि बरसात में होय वाला परेशानी ले घलो राहत मिलही।

मुख्यमंत्री के निर्देस के बाद तेज होय ए कार्रवाई ह इलाका के लोगन बर बड़े राहत साबित होही अउ कतको दिन ले रुके ए सड़क सुधार के काम ला अब गति मिलत हे।