कोरोना ल मात दे के मुंगेली पहुंचिस मरीज, त लोगन मन ह अइसे करिन स्वागत
जय जोहार…. मुंगेली जिला बर आज एक राहत भरे खबर हे। कोरोना संक्रमित एक मरीज ह स्वस्थ हो गे हे। एम्स रायपुर म इलाज के बाद ठीक होय के बाद ओला बिहनिया छुट्टी दे गिस। एखर बाद मरीज ह संजीवनी 108 एम्बुलेंस ले आज जिला मुख्यालय म स्थित क्वारेंटाइन सेंटर रामगढ़ पहुंचिस। इहां आम लोग अऊ स्वास्थ्य विभाग के अमला ह आरती उतार अऊ पुष्प वर्षा कर ओखर अभिनंदन करिन। ए अवसर पर कलेक्टर पीएस एल्मा ह घलो मरीज ल स्वस्थ होय म बधाई दिस अऊ ओखर हालचाल घलो जानिस।
मुख्य चिकित्सा अऊ स्वास्थ्य अधिकारी डॉ. महादेव तेदवे ह बताइस कि डिस्चार्ज हुये मरीज ह जिला के विकासखंड लोरमी के हे। मरीज ह प्रवासी श्रमिक हे। मरीज ह अपन गांव म स्थित क्वारेंटाइन सेंटर म ठहरे हुये रहिस। ए दौरान ओखर सैम्पल लेके जांच कराय म पाजिटिव पाय गे रहिस। ए मरीज ल एम्स रायपुर म भर्ती कर इलाज करे गिस। नौ दिन म कोरोना ल मात देके मजदूर ह आज वापस लहुटे हे।
