दंतेवाड़ा। राष्ट्रपति रामनाथ कोविंद ह जिला के जावंगा म आदिवासी लइका मन के संग बइठ के पारंपरिक अंदाज म भोजन करिन । दू दिवसीय प्रवास के पहिली दिन राष्ट्रपति ह पत्तल के दोना म आदिवासी लइका मन के संग बस्तरिया अउ छत्तीसगढ़ी व्यंजन खाय। येखर संग ही राष्ट्रपति ह आदिवासी महिला चम्पा के ई-रिक्शा म सवारी घलो की।
बता दन के देस के राष्ट्रपति रामनाथ कोविंद बुधवार के छत्तीसगढ़ के बस्तर अंचल पहुंचिन। बिहनिया ले करीब साढ़े दस बजे जगदलपुर एयरपोर्ट म उंखर आगमन होइस हे। खराब मउसम के बीच म दंतेवाड़ा के जावंगा गांव पहुंचिन। इहां राष्ट्रपति रामनाथ कोविंद ह किसान मन अउ महिला स्व सहायता समूह के सदस्य मन ले मुलाकात करिन। दंतेवाड़ा म करे जात उन्नत जइविक खेती अउ महिला स्व सहायता समूहो मन के स्थानीय लघु उद्यम मन के राष्ट्रपति ह चम्पा के रिक्सा म बइठके निरीक्छन करिन अउ ओखर मन के काम ल देखके काफी प्रभावित होइन। इंटीग्रेटेड फार्मिंग सेंटर हिरानार म उमन किसान मन अउ महिलामन ले चरचा करिन।
येखर के बाद राष्ट्रपति अपन पत्नी सविता कोविंद के संग दंतेश्वरी मंदिर पहुंचिन। ये दउरान सीएम डॉ. रमन सिंह समेत अन्य नेता उंखर के संग रहिन। मंदिर म पुजारी मन ले करीब दस मिनट तक राष्ट्रपति के पूजा कराइन। दंतेवाड़ा म निरीक्छन के दउरान राष्ट्रपति कोविंद ह कहिन के देश के तरक्की म महिला मन अउ किसान कइसे अपन महंती भूमिका निभात हे, येखर सानदार उदाहरन इहां देखे बर मिलिस।
