स्कूल म शराब पी के आईस चपरासी, अउ टीचर के टेबल म बइठके लइका मन ला भदा-भद पीटिस

कटनी। ये घटना मध्यप्रदेश के कटनी जिला के बड़वारा गांव के आय। बालक माध्यमिक शाला म चपरासी हा शराब के नशा म लइका मन ला भदा-भद मारे हे। एकर वीडियो सामने आए के बाद चपरासी ला शिक्षा विभाग हा निलंबित कर दे हे।

ए मामला म प्रधानाध्यापक अउ अतिथि शिक्षक के भूमिका संदिग्ध माने जावत हे। अतिथि शिक्षक हा उही क्लास रूम म उपस्थित रिहिस, जिहां चपरासी हा बच्चा मन ला पीटत रिहिस।

जानकारी मिले हे कि 2 जुलाई के चपरासी हा कक्षा म आईस अउ शिक्षक के टेबल म बइठ गे। अउ एक-एक झन लइका ला बला-बला के उंकर धुनई करत रिहिस। लइका मन के करलई अकन ले पिटई के वीडियो सामने आए के बाद कलेक्टर के निर्देश म डीईओ हा चपरासी जयप्रकाश मिश्रा ला निलंबित कर दे हें।

बताए गे हे कि स्कूल के चपरासी जयप्रकाश मिश्रा अउ बीईओ कार्यालय के चपरासी संजय मार्को हा स्कूल परिसर म बइठ के पहिली शराब पीन। एकर बाद ओमन सीधा क्लासरूम म घुस गें। बीईओ कार्यालय के चपरासी संजय मार्को हा छात्र मन ला एक-एक करके बलावत जाय अउ स्कूल के चपरासी जयप्रकाश मिश्रा हा छात्र मन ला स्कूल ड्रेस नई पहने हस, तोर बाल बड़े-बड़े हे, अइसे काहत भदा-भद पीटत जाय।

पिटई के वीडियो वायरल होय के बाद डीईओ हा ओला देखते ही बीआरसी कार्यालय बड़वारा ले जांच बर टीम भेजिस। वीडियो म जो घटना देखाए गे हे, बच्चा मन ओकर पुष्टि करिन। एकर बाद चपरासी ला निलंबित कर दिए गिस।