जनम लेत अब बन जही लइका के स्थायी जाति प्रमाण-पत्र, चक्कर काटे ले मिलही मुक्ति
रायपुर। अब होवत साठ लइका मन के स्थायी जाति प्रमाण-पत्र बने के चालू हो गे हे। कोरबा जिला म दूधमुंही नोनी प्रनिधि हा अभी महीना भर के हे, लेकिन ओकर स्थायी जाति प्रमाण-पत्र बन गे हे।
अनुसूचित जनजाति वर्ग के प्रनिधि के पिता अनिल कुमार कंवर अउ माता श्रीमती अनिता कंवर घलो खुस हे। अनिल ल ए बात के बहुत खुसी हे कि प्रदेस सरकार हा जनम होय के संग ही लइका मन के स्थाई जाति प्रमाण पत्र बनाए के फैसला ले हे।
अनिल कंवर हा जानत हे कि पहिली जाति प्रमाण पत्र बनाए बर कतका मुस्किल के सामना करे बर पड़य। मिसल निकलवाए बर, वंशवृक्ष बनवाए अउ पटवारी प्रतिवेदन ले लेके नोटरी कराए म ही कतको दिन निकल जाए।
कोरबा जिला के करतला विकासखंड के ग्राम पठियापाली निवासी रमेश कुमार कंवर अउ श्रीमती रोहिणी कंवर ला अपन छह महीना के बेटा दीपांशु कंवर के स्थाई जाति प्रमाण पत्र मिल गे। जिला के प्रभारी मंत्री डॉ प्रेमसाय सिंह टेकाम के हाथ ले ओमन ला जइसे ही मिलिस, इंहा उपस्थित भीड़ हा जोरदार ताली बजा के ए पहल के सराहना करिस।
अनिल कंवर अउ रमेश कुमार हा बताईन कि स्थाई जाति प्रमाण पत्र बनवाए बर आवेदन के साथ अपन स्थाई जाति प्रमाण पत्र, अउ लइका के जन्म प्रमाण पत्र ही दे ला पड़िस। मुख्यमंत्री श्री भूपेश बघेल हा प्रदेस म जन्म के साथ ही स्थाई जाति प्रमाण पत्र प्रदान करे के निर्देस दे हें।
