दर्दनाक सड़क हादसा, खड़े हाइवा ले टकराईस पिकअप, एक के मउत अउ 18 के हालत गंभीर

आरंग। पारागांव म सोमवार देर रात एक पिकअप ह मवेशी ल बचाए के चक्कर म सड़क किनारे खड़े हाइवा ले टकरा गिस। टक्कर अतेक जबरदस्त होईस कि पिकअप सवार एक झन मनखे के दर्दनाक मउत हो गे। उंहे 23 झन घायल हो गे, जेमा 18 झन के हालत गंभीर हे।

जानकारी के मुताबिक महासमुंद जिला के सम्भर गांव ले रायपुर जिला के टेकारी गांव म आयोजित डांस प्रतियोगिता म भाग ले बर पिकअप म सवार होके निकले रिहिन। रातकन करीब 2 बजे आरंग के पारागांव म सड़क म बईठे मवेशी ल बचाए के चक्कर म पिकअप वाहन ह अनियंत्रित होगे अउ सड़क किनारे खड़े हाइवा ले टकरा गिस। ये हादसा म एक झन के मौका म ही मउत हो गे अउ 23 घायल हो गिन, जेेमा 18 झन के हालत गंभीर बतात हे। घायल मन ल अंबेडकर अस्पताल रायपुर म भरती करे गिन हे।