chhattisgarh के चार किसान ल परंपरागत किस्म के संरक्षण बर मिले हे पादप जीनोम सेवियर पुरस्कार, केन्द्रीय कृषि मंत्री ह दीन पुरस्कार
जय जोहार…. (chhattisgarh ) प्रदेस के बीजापुर, जांजगीर-चांपा अउ बालोद के प्रगतिसील किसान लिंगुराम ठाकुर, दीनदयाल यादव, हेतराम देवांगन अउ संजय प्रकाश चौधरी ल देसी अउ परम्परागत किस्म के संरक्षण अउ संवंर्धन बर पादप जीनोम सेवियर पुरस्कार ले डेढ़ लाख रुपिया के रासि अउ प्रसस्ति पत्र प्रदान कर के सम्मानित करे गेहे। नई दिल्ली के पूसा परिसर म आयोजित सम्मान समारोह म केन्द्रीय कृषि मंत्री नरेन्द्र सिंह तोमर ह छत्तीसगढ़ राज्य के चार प्रगतिसील कृषक ल सम्मानित करीन।
(chhattisgarh ) ये सम्मान ल भारत सरकार के कृषि अउ किसान कल्याण मंत्रालय के पौधा किस्म अउ कृषक अधिकार संरक्षण प्राधिकरण डहार ले हरेक बच्छर देस के कृषक मन ल देसी अउ परम्परागत किस्म के संरक्षण, संवंर्धन अउ ए किस्मों के उत्पादन ल बढ़ावा दे बर प्रदान करे जात हे।
सम्मान समारोह म कृषि महाविद्यालय, रईपुर के आनुवांसिकी अउ पादप प्रजनन विभाग के विभागाध्यक्ष अउ पौधा किस्म अउ कृषक अधिकार संरक्षण प्राधिकरण, छत्तीसगढ़ के नोडल अधिकारी, डॉ. दीपक शर्मा घलो उपस्थित रिहीन। (chhattisgarh ) प्रदेस के कृषि मंत्री रविन्द्र चौबे अउ इंदिरा गांधी कृषि विश्वविद्यालय के कुलपति डॉ. एस.एस. सेंगर ह पुरस्कृत कृषक मन ल बधाई अउ सुभकामना दीन।
