अभनपुर के पास तेंदूआ के दू शावक के संग दू झन तस्कर गिरफ्तार

रायपुर। राजधानी पुलिस ह तेंदूआ के दू शावक के संग दू झन तस्कर ल गिरफ्तार करिन हे। दूनों आरोपी ह रायपुर चूनाभट्‌टी के रहैय्या हरे। ओखर मन के खिलाफ सिविल लाइन थाना म वन्यप्राणी अधिनियम के तहत मामला दर्ज करे गे हे।

जानकारी के मुताबिक पुलिस ल मुखबीर ले सूचना मिलिस कि एक ठन स्कूटी म पिंजरा म भरके तेंदूआ के शावक ल ले जाथे। सूचना के आधार म पुलिस ह नाकाबंदी कर अभनपुर के पास घोंट गांव म आरोपी मन ल पकड़िन हे। पूछताछ म आरोपी साबिर अली अउ राकेश ह बतईन कि तेंदूआ के शावक ल वो मन ह जंगली इलाका ले 50 हजार रूपिया म खरीदे रहीस, जेला बेचे बर ग्राहक तलाश करत रिहिन।

पुलिस ह ये मामला म अउ लोगन के शामिल होय के आशंका जतात हे। उंहे तेंदूआ के दूनो शावक ल वन विभाग ल सौंप दे गिन हे।