बुकमरका जंगल में पुलिस नक्सली मुठभेड़….. भारी मात्रा में नक्सलियों का रसद और दैनिक उपयोग की चीजें बरामद

राजनांदगांव। जिला के मानपुर थाना के अन्तर्गत बुकमरका जंगल म सुरक्षाबल अउ नक्सली मन  के बीच बुधवार को होए मुठभेड़ के संबंध म नक्सल ऑपरेसन डीआईजी पी सुंदरराज ह कहिन के  मुठभेड़ खत्म हो गेहे। घटना स्थल के सर्चिंग करे म  बड़ संख्या म विस्फोटक सामग्री, हथियार अउ अन्य सामग्री बरामद होइस हे।  ए मुठभेड़ म कतको नक्सली मन ल गोली लगिस हे।  उहें हमार सबो जवान सुरक्षित हवय। अभु घलोक सर्चिंग अभियान जारी हवय। संझा तक कोनो नवां अपडेट मिले के  संभावना हे।

ए संयुक्त कार्रवाई राजनांदगांव डीआरजी अउ एसटीएफ ह करिस हे।  जवान मन के  जवाबी कार्रवाई  ह अपन ऊपर भारी पड़त देख नक्सली मन मउका ले फरार होगे।  एएसपी लाखन पवार के कहिना ह के पुलिस के फायरिंग म मउका ले कोनो भी नक्सली के शव बरामद नइ करे गिस हे। इहें सर्चिंग पार्टी नक्सली मन के  भागे के दिशा म लगातार सर्चिंग करत रहिस हे।

पुलिस नक्सली मुठभेड़ के बाद मउका  ले पुलिस ह भारी मात्रा म नक्सली मन के रसद अउ दइनिक उपयोग के चीज बरामद   करिस हे।  एमा पिट्ठू, सोलर चार्जर, खाए-पीए के सामान सहित तार अउ टिफिन जइसे चीज मन घलो  मिलिस हे। पुलिस नक्सली मुठभेड़ के बाद नक्सल ऑपरेसन ल लीड करइया  एसपी कमल लोचन कश्यप मानपुर बर रवाना होगिस हे।  उमन घटनास्थल के जायजा ले बर गेहे।

उहें  दूसर ओर नक्सली मन ह अंतागढ, आमाबेडा अउ कामता मार्ग म बइनर बांध के दुबारा चेतावनी दीस हे। एमा अंतागढ एसडीओपी पुपलेश कुमार ह मउका म पहुंच के जांच के आदेस देय हे।  शराब दुकान के तीर लगाए गे पोस्टर म 25 ले 31 जनवरी तक प्रचार अभियान चलाए अउ 31 जनवरी के भारत बंद के ऐलान करे गेहे। ए परचा दंडकारण्य स्पेसल जोनल कमेटी ह जारी करिस हे।