पुलिस पब्लिक स्कूल ल मिलिस सीबीएसई के मान्यता, कम फीस म पढ़ाई के होही व्यवस्था

जय जोहार…. मुख्यमंत्री भूपेश बघेल ह शिक्षा के स्तर ल बढ़ाये बर सदैव प्रयासरत रहत हे। ए क्रम म विशेष प्रयास ले पुलिस पब्लिक स्कूल, पेंशनबाड़ा ल सीबीएसई ह बारहवीं कक्षा तक मान्यता ल प्रदान कर दे हे। उल्लेखनीय हे कि स्कूल भवन ह कई वर्ष ले खाली पड़े जर्जर होवत रहिस। नवा सरकार ह आये के बाद मुख्यमंत्री भूपेश बघेल ह एखर मरम्मत करा के स्कूल ल अच्छा ले संचालित करे के निर्देश दे रहिस। जेखर बाद ले नवा सिरा ले योजना बना के स्कूल ल संचालित करे जात हे।

सीबीएसई के विशेष टीम के निरीक्षण म सबो मानक ल पूरा पाये गिस, जेखर बाद मान्यता ल प्रदान करे गिस। अभी तक स्कूल ह कक्षा आठवीं तक संचालित होवत रहिस। ए सत्र ले इहां के छात्र-छात्रा मन ह नवमी म एडमिशन ले सकही। स्कूल म पुलिस कर्मी के अलावा आम नागरिक मन के बच्चा मन ल घलो प्रवेश दे जात हे।

डीजीपी डीएम अवस्थी ह बताइस कि ए स्कूल के खास बात ह कि इहां पुलिस कर्मी ही शिक्षक के भूमिका ल निभावत हे। सबो योग्यता ल पूरा करइया पुलिसकर्मी मन ल इहां पदस्थ करे गे हे। इहां पढ़ाई के संगेसंग खेलकूद अऊ अन्य गतिविधि घलो संचालित होवत रहत हे।