देह व्यापार के अड्‌डा म पुलिस के छापा, दू लड़की संग एक लड़का अउ महिला दलाल गिरफ्तार

जांजगीर चाम्पा। शिवरीनारायण म जिस्मफरोशी के धन्धा के पर्दाफाश होये हे। एक महिला दलाल, 2 युवती अउ 1 युवक समेत चार झन ला गिरफ्तार करे गे हे। महिला दलाल के घर म ये धन्धा चलत रिहिस हे। मुखबिर ले सूचना मिलिस त शिवरीनारायण पुलिस हा छापामार के गिरफ्तार करिस।

जानकारी के मुताबिक आरोपी मन के खिलाफ पीटा एक्ट के तहत कार्रवाई करे जावत हे। जांजगीर चांपा जिला के शिवरीनारायण थाना क्षेत्र के वार्ड नंबर 01 बस स्टैण्ड मोहल्ला म जिस्मफरोशी होये के सूचना शिवरीनारायण पुलिस ला लगातार मिलत रिहिस।

मुखबिर के सूचना पाके शिवरीनारायण पुलिस हा टीम बना के महिला दलाल के घर म दबिश दिस, अउ महिला के घर के कमरा म दो युवती अउ एक युवक ला संदिग्ध हालात म पकड़िस।

साथ ही कमरा ले मोबाइल अउ 15 सौ रूपया नकद जब्त करे गिस। पकड़े गे दो युवती मन म एक युवती मुंगेली जिला के रहने वाली हे, अउ दूसर युवती हा कोरबा जिला के रहवइया ए।

उहें युवक हा मुलमुला थाना क्षेत्र के गांव चोरभट्टी के रहवइया ए। पुलिस हा चारों आरोपी मन ला गिरफ्तार करे हे। सबो आरोपी मन के खिलाफ पीटा एक्ट के तहत कार्रवाई करे जावत हे।