राजधानी म पुलिस ह निकालिस फ्लैग मार्च, लॉकडाउन के कड़ाई ले पालन करे बर लोगन मन ल दिस हिदायत

जय जोहार…. लॉकडाउन के कड़ाई ले पालन करवाय बर रायपुर पुलिस ह सनिच्चर के शहर म फ्लैग मार्च निकालिस। एमा रायपुर पुलिस के एसएसपी, एएसपी, सीएसपी अऊ टीआई शामिल रहिन।

बता देन कि राजधानी म सनिच्चर अऊ इतवार के पूर्ण लॉकडाउन हे। अइसे म पूर्ण लॉकडाउन के पालन कराय ल पुलिस ह शहर के मुख्य रद्दा म फ्लैग मार्च निकालिस। ए दौरान फालतू घूमइया लोगन मन ल हिदायत दे गिस।

एसएसपी आरिफ शेख ह बताइस कि लॉकडाउन-4 म बड़ अकन रियायत दे गे हे। एखर बावजूद घलो लोगन मन ह वीकेंड म टोटल लॉकडाउन के पालन ल नई करत हे। एखर सेति ए फ्लैग मार्च निकाले गे हे। एसएसपी ह चेतावनी दे हे कि जेन भी नियम के उल्लंघन करही। ओखर खिलाफ कड़ी कार्रवाई करे जाही।