दो शातिर वाहन चोर गिरफ्तार, पुलिस ह जब्त करिस आठ दोपहिया वाहन

जय जोहार रायपुर…. मोटर साइकिल चोरी करइया दो शातिर आरोपी मन ल खमतराई पुलिस ह गिरफ्तार करिस। आरोपी मन ले पुलिस ह आठ गाड़ी ल बरामद करिस। जेला खमतराई के अलग-अलग इलाका ले आरोपी मन ह चोरी करे रहिस।

खमतराई थाना प्रभारी रमाकान्त साहू के मुताबिक बीरगांव के रहवइया आरोपी लव साहू अऊ कुबेर विश्वकर्मा ल मोटरसाइकिल चोरी के मामला म गिरफ्तार करे गिस। एखर पास ले आठ गाड़ी ल जब्त करे गे हे। एमा ले छह के वाहन मालिक मन के पता चल गिस हे।

थाना प्रभारी ह बताइन कि दोनों आरोपी मन बंजारी, खमतराई समेत कई जगह मन ले दोपहिया वाहन मन ल चोरी करे रहिस। गाड़ी चोरी करे के बाद ये कोनो सुनसान जगह म छुपा देत रहिस। उरला म चोरी के मामला म एक साल पहिली जेल जा चुके हे। वर्तमान म चोरी के दो बाइक के ये उपयोग करत रहिस।