छत्तीसगढ़ मा हाईटेक होईस पुलिसिंग

• बलौदाबाजार मा ‘नेक्स्ट जेन डायल-112’ गाड़ी ला राजस्व मंत्री ह देखाइन हरी झंडी
• फॉरेंसिक अउ हाई-वे पेट्रोलिंग वैन के संग 15 आधुनिक गाड़ी के बेड़ा तैयार
• अब सहर अउ गांव के इलाका मा मिनट मा मिलिही आपातकालीन मदद

रायपुर. प्रदेश मा कानून अउ सुधिरता व्यवस्था ला मजबूत करे बर अउ आम जनता ला तुरते आपातकालीन सहायता (मदद) पहुंचाए के डहर मा आज एक बड़ कदम उठाए गिस। राजस्व मंत्री टंक राम वर्मा ह बुधवार के दिन जिला मुख्यालय बलौदाबाजार के रक्षित केंदर (पुलिस लाइन) परिसर ले आधुनिक तकनीक ले लैस ‘नेक्स्ट जेन सीजी डायल-112’ गाड़ी ला हरी झंडी देखाके रवाना करिन।

ए नवा बेड़ा मा डायल-112 के 12 ठन सामान्य गाड़ी के संग-संग बड़े सड़क हादसामन ले निपटे बर 2 ठन हाई-वे पेट्रोलिंग वैन अउ तुरते जांच-पड़ताल बर 1 ठन मोबाइल फॉरेंसिक वैन सामिल हे। ए मउका मा जिला पंचायत अध्यक्ष आकांक्षा जायसवाल, नगर पालिका अध्यक्ष अशोक जैन, कलेक्टर कुलदीप शर्मा अउ पुलिस अधीक्षक (एसपी) ओपी शर्मा के संग कतको बड़े जनपरतिनिधि अउ परासासन के अधिकारी मन उपस्थित रीहिन।

मुखमंत्री के सोच के मुताविक मजबूत होही पुलिसिंग: मंत्री टंक राम वर्मा

गाड़ी ला रवाना करत हुए राजस्व मंत्री टंक राम वर्मा ह कहिन कि मुखमंत्री विष्णु देव साय के सोच के मुताविक प्रदेश मा पुलिस व्यवस्था ला आधुनिक अउ मजबूत बनाए जात हे। ए आपातकालीन सेवा के बाढ़े ले जिला के जम्मो 12 थाना मन के सहर अउ गांव के इलाका मा 24 घंटा कभू घलो दुर्घटना, अपराध या आपात स्थिति मा सिरिफ एक कॉल करे ले मिनटों के भीतर मदद पहुंच जाही।

स्मार्टफोन, जीपीएस अउ डैश कैम ले लैस हें गाड़ियाँ

अधिकारी मन ह बताइन कि ए नवा गाड़ी मन पूरा तरीखा ले ‘हाईटेक’ (आधुनिक) हें। ए आधुनिक गाड़ी मा सुरक्छा अउ तुरते कारवाही बर जीपीएस (GPS), वायरलेस रेडियो, पीटीजेड (PTZ) कैमरा अउ डैश कैम लगे हे, जेकर से लाइव मॉनिटरिंग करे जा सकथे। कंट्रोल रूम ले गाड़ी के लोकेशन ट्रैक करके पीड़ित मनखे के सबले नजकीच वाले गाड़ी ला तुरते मउका मा भेजे जाही। नागरिक मन अब सिरिफ फोन मा बात करके च नई, भलुक एसएमएस, व्हाट्सएप, चैटबॉट, ईमेल अउ ‘SOS-112 इंडिया ऐप’ के माध्यम से घलो सीधे मदद मांग सकिहें।

ए आधुनिक गाड़ी के आए ले बलौदाबाजार जिला मा अपराध ला रोके मा अउ सड़क दुर्घटना के बखत ‘गोल्डन ऑवर’ (सुरुअत के जरूरी समे) मा घायल मनखे मन ला अस्पताल पहुंचाए मा बड़ मदद मिलिही।