गरीब परिवार मन ल जून महीना के चावल मिलही नि:शुल्क, उचित मूल्य के दुकान ले होही वितरण

जय जोहार रायपुर…. छत्तीसगढ़ म कोरोना वायरस के संक्रमण ले रोकथाम के प्रबंधन के तहत मुख्यमंत्री भूपेश बघेल ह प्रदेश के गरीब परिवार मन ल जून माह के घलो चावल नि:शुल्क प्रदान करे के निर्देश दे हे। छत्तीसगढ़ सरकार के तरफ ले अप्रैल अऊ मई के चावल घलो नि:शुल्क प्रदान करे गे हे। सार्वजनिक वितरण प्रणाली के तहत राशन कार्डधारी मन ल जून माह के चावल के संगेसंग प्रधानमंत्री गरीब कल्याण अन्न योजना के हितग्राही मन ल अप्रैल ले जून तीन माह के अतिरिक्त चावल घलो वितरित करे जाही। खाद्यान्न के वितरण उचित मूल्य के दुकान मन ले एक मई ले प्रारंभ करे जाही।

छत्तीसगढ़ सरकार के तरफ ले अंत्योदय, नि:शक्तजन, एकल निराश्रित अऊ अन्नपूर्णा राशन कार्डधारी मन ल जून माह के नि:शुल्क चावल वितरित करे जाही। एखर संगेसंग राष्ट्रीय खाद्य सुरक्षा अधिनियम के अंतर्गत प्रचलित राशन कार्डधारी मन बर प्रधानमंत्री गरीब कल्याण अन्न योजना, छत्तीसगढ़ राज्य अऊ पोषण सुरक्षा अधिनियम के अंतर्गत प्रचलित अंत्योदय अऊ प्राथमिकता श्रेणी के राशन कार्डधारी मन ल नियमित आबंटन के संग अप्रैल ले जून तीन महीना के अतिरिक्त चावल के नि:शुल्क वितरण ह एक मई ले प्रारंभ करे जाही।