प्रधानमंत्री आवास योजना ले जशपुर मा बदलिस हजारों परिवार के जिनगी
पक्का छत के नीचे सुरक्षित अउ सम्मान वाला जिनगी, खास पिछड़ी जनजाति मन ला घलो मिलिस घर
रायपुर . मुख्यमंत्री विष्णु देव साय के अगुवाई मा छत्तीसगढ़ मा सुसासन (नीक सासन) के दिसा मा जऊन घलो जनकल्याणकारी योजना मन चलाय जावत हें, ओखर बड़े असर दिखे ला मिलत हवय। प्रधानमंत्री आवास योजना अउ पीएम जनमन योजना के बढ़िया ढंग ले लागू होय ले जशपुर जिला के हजारों परवार मन के जिनगी मा एक नीक बदलाव आय हवय। अब मनखे मन पक्का छत के नीचे सुरक्षित अउ सुकुन के जिनगी जीयत हें|
जसपुर जिला मा अब तक 28 हजार ले जादा परवार मन ला पक्का मकान दिय जा चुके हवय, जेखर से बछर मन ले कच्चा घर मा रहत मनखे मन ला बड़े राहत मिलिस हे। पहिली जहाँ बरखा के दिन मा घर मा पानी भर जाय अउ मनखे मन ला भारी दिक्कत होय, उहें अब पक्का मकान ह उमन ला सुरक्षा अउ सनमान के जिनगी दीस हवय। प्रधानमंत्री आवास योजना के तहत बछर 2024-25 मा जिला मा 50 हजार 797 घर मंजूर करे गे हवय, जेमा ले 28 हजार 915 घर बनके तइयार हो गे हें। ए घर मन मा रहइया परवार अब साफ पानी, बिजली, संडास अउ गैस (LPG) जइसन बुनियादी सुबिता मन के साथ बढ़िया जिनगी जीयत हें।
उहें, पीएम जनमन योजना के तहत बछर 2023 ले 2025 के बीच मा जिला मा 2,040 घर मंजूर करे गिस, जेमा ले 1,233 खास पिछड़ी जनजाति परवार मन ला घर मिल चुके हवय। ए योजना ह खास करके जनजाति समाज ला आगू बढ़ाय बर चलाय जावत हे, जेमा घर के संग-संग सुवास्थ्य, सिक्छा, पोषण, रद्दा अउ मोबाइल-नेटवर्क जइसन सुबिता मन ऊपर घलो खास धियान दिय जावत हवय।
राज सरकार डहर ले ‘आवास प्लस 2.0 सर्वे’ के तहत जऊन परिवार मन छूट गे रहिन, उंखर घलो पहिचान करे जावत हे। जिला मा 1 लाख 02 हजार 371 परवार मन के फिर ले सर्वे (पुनः सर्वेक्षण) करे गे हवय, ताकि उंखर पात्रता के आधार मा उमन ला घलो योजना मन के लाभ मिल सके।
छत्तीसगढ़ सरकार के संवेदनसील अउ सब्बो ला संग मा लेके चले के सोंच के ही ए फल आय कि आज जशपुर जिला मा हजारों परिवार मन ला सुरक्षित घर के संग मा बढ़िया जिनगी के आधार मिलिस हे। ए कोसिस न केवल मनखे मन के जिनगी के स्तर ला सुधारत हे, बल्कि उमन ला सनमान के साथ जिये के मउका घलो देवत हवय।
