मुंगेली विधानसभा चुनाव ……गणतंत्र दिवस के चीफ गेस्ट उपर निष्कासन के कार्यवाही…….कांग्रेस के समीक्षा बइठक….

कांग्रेसी मन ह  ठीकरा फोड़िस पार्टी के प्रमुख पदाधिकारी  मन उपर

 नवनीत शुक्ला

मुंगेली। विधानसभा चुनाव म मिले हार ले नाराज कांग्रेसी मन ह  ठीकरा पार्टी के प्रमुख पदाधिकारी उपर फोड़िस। चुनाव के बाद होयई समीक्षा बइठक म प्रभारी अर्जुन तिवारी के आघू कांग्रेसी मन ह जमके भड़ास निकालिस । पार्टी के ही कार्यकर्ता मन  नेता मन  अपन गुस्सा निकालिस।

बइठक म प्रमुख रूप ले विधानसभा प्रत्याशी राकेश पात्रे, जिलाध्यक्ष आत्मा सिंह ,प्रदेश सचिव हेमेंद्र गोस्वामी प्रदेश सयुंक्त महामंत्री श्याम जायसवाल, शहर अध्यक्ष रोहित शुक्ला, जिला उपाध्यक्ष स्वतंत्र मिश्रा रहिन हे।  जिला कांग्रेस कमेटी के होय बइठक म जिहां 4 प्रमुख पदाधिकारी मन के निष्कासन के अनुशंसा करे गिस हे।  उहें 2 कार्यकर्ता मन ल  6 साल के बर पार्टी ले निष्कासित करे के कार्यवाही करे गिस।

जिला पंचायत अध्यक्ष उपर निष्कासन के कार्यवाही

लोकसभा चुनाव के पहिली करेगे  ए कार्यवाही ल काफी बड़ फइसला माने जात हे। काबर के जे नेता मन उपर कार्यवाही के फइसला लेय गेहे, ओमा  सबले प्रमुख कृष्णा बघेल के नाम हे जे  वर्तमान म जिला पंचायत के अध्यक्ष हे अउ जे मन के तीर आगामी 26 जनवरी के सलामी अउ परेड ले के सरकारी फरमान आय हे।  मतलब ए फइसला ल राजनीतिक चस्मा ले  देखे जाए त एक ओर सत्तारूढ़ भूपेश बघेल के सरकार  ह जे ला ध्वजारोहण के कार्यभार देय ओला कांग्रेस पार्टी ह चुनाव म निष्क्रिय रहे अउ चुनाव म सहयोग नइ करे के नोटिस देवत हे।

दूसरे नाम मन म पूर्व विधायक चुरावन मंगेशकर के नाम हे 2 बार के विधायक अउ 32 बार के प्रत्यासी रहे मंगेशकर उपर चुनाव म पार्टी विरोधी कार्य करे के आरोप लगत हे। एखर  अलावा एक बड़े नाम हे प्रदेश सचिव , पूर्व जनपद उपाध्यक्ष अउ विधानसभा दावेदार दुर्गा बघेल, जे ह जिला पंचायत कृष्णा बघेल के पति हे। उमन ह ए विधानसभा चुनाव म प्रमुख दावेदार रहिन हे, उहें एक अउ बड़े नाम उमेश धृतलहरे के हे। ए घलो विधानसभा के एक दावेदार रहिन हे।

मोला बइठक के जानकारी नइए

पार्टी ह जे 2 लोगन उपर 6 साल बर निष्कासन के कार्यवाही करे गेहे। ओमा लक्ष्मीकांत भास्कर उपर चुनाव  निष्क्रिय रहे अउ दूसर विधानसभा म जाके काम करे के आरोप लगाय गेहे। संग ही शब्बर बोहरा उपर जोगी कांग्रेस के पक्ष म काम करे के आरोप लग चुके हे। उक्तासय के जानकारी जिला महामंत्री संजय यादव  ह दीस हे।  ए विषय म जब पूर्व विधायक चुरावन मंगेशकर ल फोन म जानकारी लेय गिस त  उमन कहिन के  मैं कांग्रेस के समर्पित कार्यकर्ता हव अउ ए तरह के कोनो बइठक के मोला जानकारी नइए।  एखर सेती  मैं कोनो किसम के बात नइ कर सकव।  कृष्णा बघेल ह ए विषय म कहिन के मोला अभी तक कोनो नोटिस नइ मिले हे, बिना जानकारी कोनो बात नइ कह सकव।  दुर्गा बघेल ह कहिन के,  अइसन कोनो जानकारी नइए ।