संपत्ति कर ल जमा करे के आखिरी तारीख ह बाढ़ीस, अब 31 मई तक कर सकत हे भुगतान

जय जोहार…. छत्तीसगढ़ सरकार ह संपत्ति कर अऊ विवरणी जमा करे के आखिरी तारीख ल बढ़ा दे हे। अब 31 मई तक करदाता ह बगैर अतिरिक्त शुल्क के भुगतान कर सकत हे। पूर्व म एखर बर 15 मई आखिरी तारीख तय करे गे रहिस, लेकिन कोरोना संक्रमण ल रोके बर लॉकडाउन के सती तारीख म बढ़ोतरी करे गे हे।

नगरीय प्रशासन अऊ विकास विभाग ह ए संबंध म प्रदेश के सब्बो कलेक्टर, नगर निगम आयुक्त अऊ मुख्य नगर पालिका अधिकारी मन ल पत्र जारी कर दे हे। पत्र म निर्देशित करे गे हे कि संपत्ति कर जमा करे बर अवइया सब्बो लोगन मन ल फिजिकल डिस्टेसिंग के पालन करे ल होही। नगरीय निकाय के कर्मचारी घलो फिजिकल डिस्टेंसिंग के पालन करत हुए घर-घर म जाके संपत्ति कर के वसूली करही। संगेसंग लोगन मन ल आनलाइन भुगतान बर प्रेरित करही।