सबले बड़े खबर, धारा 370 खत्म, जम्मू-कश्मीर अउ लद्दाख अब अलग-अलग केंद्र शासित प्रदेश बनही

जम्मू-कश्मीर ले धारा 370 हटा दे गे हे। देश के राजधानी दिल्ली ले ये बड़े खबर मिलत हे कि अब ले कुछ देर पहिली देश के गृहमंत्री श्री अमित शाह हा राज्य सभा म धारा 370 ला हटाए बर संकल्प पेश करिन।

सदन म भारी हंगामा होवत हे। ए बीच म यहू खबर मिलत हे कि जम्मू-कश्मीर ले धारा 370 हटाए के अधिसूचना म राष्ट्रपति के हस्ताक्षर घलो होगे हे। जम्मू कश्मीर ले विशेष राज्य के दर्जा छिन ले गे हे। राज्य के दू हिस्सा कर दे गे हे अउ अब जम्मू-कश्मीर अउ लद्दाख अलग-अलग केंद्र शासित प्रदेश बनहीं।

नई दिल्ली। केंद्रीय गृह मंत्री अमित शाह हा सोमवार के राज्यसभा म अनुच्छेद 370 ला हटाए बर संकल्प पेश करिन। जम्मू-कश्मीर अउ लद्दाख अब अलग-अलग केंद्र शासित प्रदेश होहीं।

एकर पहिली जब राज्यसभा के कार्यवाही शुरू होईस त सभापति एम वेंकैया नायडू हा शाह ले जम्मू-कश्मीर आरक्षण संशोधन विधेयक पेश करे बर किहिन। ए बात म विपक्ष के नेता गुलाम नबी आजाद हा किहिन कि कश्मीर म कर्फ्यू हे। तीन पूर्व मुख्यमंत्री मन ला नजरबंद कर दिए गे हे। राज्य म हालात वइसे ही हे, जइसे जंग के वक्त होथे। विधेयक तो पारित हो जाही। हमन विधेयक के खिलाफ नई हन, लेकिन हमन ला पहिली कश्मीर के हालात म चर्चा करना चाही।

आजाद के बयान ल लेके गृह मंत्री अमित शाह हा किहिन कि जम्मू-कश्मीर के मुद्दा म हर जवाब दे बर तैयार हंव अउ ये विधेयक भी कश्मीर के संबंध म हे। ओमन किहिन कि ए सदन म पेश संकल्प के पारित होय के बाद, ओमा राष्ट्रपति के हस्ताक्षर अउ सरकारी गैजेट म ओकर प्रकाशित होए के बाद जम्मू-कश्मीर के संबंध म अनुच्छेद 370 के सबो खंड लागू नई होय।