आन राज्य म फंसे मजदूर मन के वापसी बर 21 ट्रेन के व्यवस्था, मोहन मरकाम ह मुख्यमंत्री के जताये हे आभार
जय जोहार…. प्रदेश कांग्रेस अध्यक्ष मोहन मरकाम ह दूसर राज्य म फंसे छत्तीसगढ़ के मजदूर मन बर 21 ट्रेन के व्यवस्था करे जाने म मुख्यमंत्री भूपेश बघेल के प्रति आभार व्यक्त करे हे। वो हा कहिन कि मुख्यमंत्री भूपेश बघेल ह दूसर राज्य ले श्रमिक मन ल वापस लाय के संगेसंग छत्तीसगढ़ ले होके पैदल गुजरत आन राज्य के श्रमिक मन के भोजन अऊ ओमन ल सीमा तक छोड़े के व्यवस्था ल करवात हे। अईसा पूरा देश म सिरिफ छत्तीसगढ़ के कांग्रेस सरकार अऊ मुख्यमंत्री भूपेश बघेल ह करत हे।
कांग्रेस सरकार के तरफ ले लॉकडाउन के सती आन राज्य म फंसे छत्तीसगढ़ के श्रमिक, छात्र अऊ चिकित्सा के आवश्यकता वाले व्यक्ति मन के छत्तीसगढ़ वापसी बर 21 स्पेशल ट्रेन के इंतजाम करे गे हे। ए स्पेशल ट्रेन म श्रमिक मन के राज्य वापसी के सिलसिला ह सुरू होय म प्रदेश कांग्रेस अध्यक्ष मोहन मरकाम ह संतोष व्यक्त करे हे।
प्रदेश कांग्रेस अध्यक्ष मोहन मरकाम ह कहिन कि मुख्यमंत्री भूपेश बघेल के निर्देश म पहिले चरण म 9 ट्रेन म अवइया 11 हजार 946 श्रमिक मन बर कांग्रेस सरकार ह 71 लाख 93 हजार रूपिया के रेलवे ल भुगतान घलो कर दे हे।
