रायपुर। प्रदेश के नेता ममन के मुख्यमंत्री के दावेदारी ल लेके कांग्रेस अध्यक्ष राहुल गांधी ह गहरी नाराजगी जताइस। उमन ह भूपेश बघेल, नेता प्रतिपक्ष टीएस सिंहदेव समेत दिल्ली गे नेता मन ल फटकार लगात हुए कहिन कि पहिली चुनाव म ध्यान देवव, बाद म ये बात करे जाही कि छत्तीसगढ़ के मुख्यमंत्री कोन बनही।
छत्तीसगढ़ कांग्रेस म मुख्यमंत्री के पद ल लेके घमासान मचे हवय, हर कोनों ह अपन ल मुख्यमंत्री के पद के दावेदार बतावत हे। ये बात ल लेके राहुल गांधी ह नाराजगी जाहिर करे हे। बतादन कि कांग्रेस अध्यक्ष राहुल गांधी ह ई—मेल करके छत्तीसगढ़ कांग्रेस के बड़का नेतामन ल दिल्ली आए के फरमान जारी करिस। येखर बाद शुक्रवार शाम के कांग्रेस नेता मन दिल्ली रवाना होगे।
आज दुपहर म होए मुलाकात म कांग्रेस अध्यक्ष राहुल गांधी ह कहिन कि मुख्यमंत्री पद के हकदार कोन हे, येखर फइसला पार्टी तय करही। राहुल गांधी अउ मोतीलाल वोरा के संग होय ये बैठक म पीसीसी चीफ बघेल, नेता प्रतिपक्ष सिंहदेव, प्रदेश कांग्रेस प्रभारी के अलावा चरण दास महंत, राम दयाल उईके, कवासी लखमा मन के घलो मवजूदगी रहीस हे। ये सबो नेतामन ह अपन ल मुख्यमंत्री के दावेदार बताके पार्टी म विवाद के स्थिति ला दे हे। बतादन कि राहुल गांधी के कर्नाटक चुनाव परिणाम के बाद छत्तीसगढ़ दौरा प्रस्तावित हे। माने जात हे कि17-18 मई के राहुल गांधी छत्तीसगढ़ के दउरा म आ सकत हे।
