खुलासा: संस्था के करमचारी ही निकलिस चोर, करिस लाखों रूपिया पार

रायपुर. राजधानी के पुलिस ह गोलबाजार थाना इलाका के नवीन बीज उत्पादक सहकारी समिति बांसटाल म होय रिहिस लाखों रूपिया चोरी के मामला के खुलासा करिन हे. ये वारदात ल अंजाम देवइया अउ कोनो नोहय बल्कि उही संस्था म काम करैया करमचारी हरे. पुलिस ह आरोपी के खेलाफ मामला दर्ज करिन हे.

आरोपी योगेश कुमार ह बलौदाबाजार के रहवईया ये. योगेश ह चोरी करे के बाद गोदाम के भीतर ही घुसे रिहिस. अउ चोरी करे पहिली वो ह दुकान अउ गोदाम म लगाए गे सी.सी.टी.व्ही. कैमरा ल घलोक बंद कर दे रिहिस. आरोपी के पास ले पुलिस ह 3 लाख 88 हजार रूपिया बरामद करे हे.