रायपुर। मदरसा म पढ़ई करे के नाव ले एक बार फेर लइका मन ल जे जाय के मामला सामने आए हे। शनिवार के शालीमार कुर्ला एक्सप्रेस ले 13 झन लइका मन ल दुर्ग रेलवे स्टेशन म सकुशल उतार ले गे हे। ये लइका मन के उमर ह 6 ले 14 साल के हे। बता देन कि अभी तीन दिन पहिली राजनांदगांव रेलवे स्टेशन म 34 झन लइका ल घलो मदरसा म पढई करे के नाव ले मुंबई ले जात रिहिस हे, जेला जीआरपी के मदद ले उतार ले गे रिहिस।
शालीमार कुर्ला एक्सप्रेस गाड़ी संख्या 18030 म दक्षिण पूर्व मध्य रेलवे, रायपुर रेल मंडल कमर्शियल विभाग के टिकट चेकिंग स्क्वाड टी. नाग के नेतृत्व म टिकट जांच करत रिहिस। रायपुर ले टिकट चेक करत S1 ले S8 कोच म पहुंचिस, त उहां सीट नम्बर 27-28 बर्थ म लगभग 6 ले 14 साल के उमर के 13 लइका मन घलो सफर करत रिहिस। ये मन ल एक झन मनखे ह मदरसा म पढ़ई कराय के नाव ले ले जात रिहिस। टिकट चेक करइया स्टॉफ ल शंका होईस अउ वो हर लइका मन ले बात करिस। बातचीत के दउरान सच्चई के पता नई चल पईस। वो हर एखर सूचना मंडल रेल प्रबंधक कार्यालय म कमर्शियल कंट्रोल ऑफिस, रायपुर रेल मंडल के बडे अधिकारी अउ रेलवे सुरक्षा बल ल दिस। सब्बो लइका ल सकुशल दुर्ग स्टेशन म अभियुक्त के संग उतार के आघू के करवाई बर रेलवे सुरक्षा बल दुर्ग ल सौंप दिस।
