रायपुर. अब राजधानी रायपुर के मॉल अउ कॉम्पलेक्स के पार्किंग म वसूलीबाज ऊपर गाज गिरईया हे। यातायात बेवस्था के नियम के उल्लंघन करही त मॉल अउ कॉम्पलेक्स वाले मन ऊपर सख्त कार्रवाई करे जाहि. सोमवार के यातायात अतिरिक्त पुलिस अधीक्षक एमआर मंडावी ह अपन दफ्तर म शॉपिंग मॉल अउ कॉम्पलेक्स संचालक मन के बैइठक लेके ये निरदेश ल दिन हे। बईठक म करीब 25 संचालक शामिल होईन हे।
अतिरिक्त पुलिस अधीक्षक श्री मंडावी ह यातायात दुरूस्त करे बर अउ पार्किंग ल लेके महत्वपूर्ण निरदेश देवत कहिन कि जेन भी बेवस्था करे हव वो ह परयाप्त नई हे। जेन परकार ले नक्शा हे वो ह सही ढंग ले नई बने हे। बईठक म शहर के 5 ठन मॉल के संचालक अउ कॉम्प्लेक्स के 20-25 मालिक मन ल बुलाए गे रहीस, फेर ये जम्मो झन सबो निरदेश के पालन नई करही त ओखर मन ऊपर धारा 188 के तहत कार्रवाई करे जाहि, एखर बाद घलो नियम के अवहेलना करही त एफआईआर दर्ज होही।
