Raipur : मल्टीलेवल पार्किंग अउ बस टर्मिनल के मिलही सौगात, सीएम भूपेश बघेल ह 20 अगस्त के करही लोकार्पण
जय जोहार…. (Raipur) पूर्व प्रधानमंत्री राजीव गांधी के जंयती 20 अगस्त के राजधानी वासी मन बर ऐतिहासिक होय के संग सौगात ले भरा होही। राजधानी रईपुर म अंतर्राज्यीय बस टर्मिनल, मल्टीलेवल पार्किंग, शहीद स्मारक शासकीय अंग्रेजी माध्यम स्कूल समेत सीवेज ट्रीटमेंट प्लांट के लोकार्पण ल मुख्यमंत्री भूपेश बघेल डहार ले करे जाही ।
नगरीय प्रशासन अउ विकास विभाग के पहल म रईपुर सहर म सार्वजनिक बस परिवहन ल सुव्यवस्थित अउ यात्री मन बर सुगम बनाय बर भाठागांव (Raipur) म 25 एकड़ भूमि म श्री बालाजी स्वामी ट्रस्ट श्री दूधाधारी मठ अंतर्राज्यीय बस टर्मिनल के निर्माण करे गेहे। करीबन 49 करोड़ रुपिया के लागत ले ए परिसर के चार मंजिला भवन म 104 कक्ष हे, जेमा ले कार्यालयीन कक्ष, दुकान, परिवहन कार्यालय, फूड कोर्ट, यात्री प्रतीक्षालय, फूड स्टॉल, महिला अउ पुरूष डॉरमेट्री संचालित होही।
रईपुर म पार्किंग-व्यवस्था ल सु-व्यवस्थित करे ल सहर के दुसरइया मल्टीलेवल पार्किंग ल कलेक्ट्रेट परिसर (Raipur) करा बनाए गेहे, जेमा 450 चार पहिया अउ 150-200 दोपहिया वाहन के पार्किंग व्यवस्था हे। ए बहुमंजिला पार्किंग परिसर के सुरु हो जाय ले कलेक्टर कार्यालय, जिला न्यायालय, पुलिस अधीक्षक कार्यालय समेत आन सासकीय विभाग म अपन वाहन ले पहुंचइया मनखे मन ल पार्किंग के सुविधा मिल पाही।
