छत्तीसगढ़ ले राज्यसभा उम्मीदवार मन के नाम होइस घोसित, फूलोदेवी के संग तुलसी ल मिलिस टिकट

जय जोहार रायपुर…. छत्तीसगढ़ ले राज्यसभा उम्मीदवार मन के नाम घोसित कर दे गे हे। प्रदेश महिला कांग्रेस अध्यक्ष फूलोदेवी नेताम अऊ राज्यसभा सांसद केटीएस तुलसी ल राज्यसभा के टिकट दे गे हे। छत्तीसगढ़ म कांग्रेस के पास विधायक मन के संख्या दो तिहाई ले अधिक होए के चलत दुनो सीट म कांग्रेस प्रत्याशी मन के निर्विरोध निर्वाचन तय हे।

छत्तीसगढ़ म राज्यसभा के दो सीट म चुनाव होवइया हे। एक सीट ह कांग्रेस के पास हे अऊ दूसर सीट म बीजेपी के कब्जा हे। कांग्रेस के वरिष्ठ नेता मोतीलाल वोरा अऊ भाजपा के जशपुर राज परिवार के राजा रणविजय सिंह जूदेव के कार्यकाल 9 अप्रैल के खत्म हो जाही। राज्यसभा चुनाव बर 13 मार्च तक नामांकन भरे के आखिरी दिन हे। ऊहचे 16 मार्च के नाम मन के स्क्रूटनी अऊ 18 मार्च तक नाम वापस लिए जा सकही। सबो सीट म 26 मार्च के चुनाव होही अऊ ऊही दिन शाम म मतगणना होही।