राज्यसभा चुनाव के तारीख के ऐलान: राज्यसभा पहुंचे बर कांग्रेस नेता मन म होड़, 26 मार्च के होही चुनाव

जय जोहार रायपुर…. राज्यसभा के खाली होवइया दो सीट म चुनाव अगले महीना 26 मार्च के होही। एखर बर चुनाव तारीख के ऐलान घलो हो गे हे। ऐलान के संगेसंग छत्तीसगढ़ म दावेदार मन म होड़ लग गे हे। वो पार्टी ले राज्यसभा म जाए बर कई नेता मन ह लाइन म हे। छत्तीसगढ़ के विधानसभा म विधायक मन के संख्या ल देखत हुए कांग्रेस के स्थिति ह मजबूत हे। वो हा दोनों सीट ल आसानी ले जीत लेही। अभी राज्यसभा म एक सीट ह कांग्रेस कोती हे। ऊहे दूसर कोती एक सीट भाजपा के कब्जा म हे। राज्य म भाजपा ल एक सीट के नुकसान उठाना परही। राज्यसभा बर कांग्रेस के जेन दो नेता मन के नाम फाइनल होही, वो हा आसानी ले राज्यसभा पहुंच जाही। भाजपा के पास राज्यसभा चुनाव के एक सीट ल जीते बर संख्या नई हे। एखर चलत वो हा अपन कब्जा वाला एक सीट ल भी नई बचा पाही। बता देन कि छत्तीसगढ़ म मोतीलाल वोरा अऊ रणविजय सिंह जूदेव के सीट 9 अप्रैल के खाली होवइया हे।

बता देन कि भारतीय निर्वाचन आयोग ह चुनाव ल लेके तारीख के ऐलान कर दे हे। छत्तीसगढ़ के दो सीट समेत देश के 17 राज्य के 55 सीट म राज्यसभा बर एक संग 26 मार्च के वोटिंग होही।  बतावत जात हे कि राज्यसभा के लिए 6 मार्च के अधिसूचना जारी होही। 13 मार्च तक नामांकन भरे जाही। 16 मार्च तक के नाम के स्क्रूटनी होही। 26 मार्च के वोटिंग होही। ऊही दिन शाम म काउंटिंग होही।