रूस म फंसे मेडिकल छात्र मन के वापसी बर पूर्व सीएम रमन सिंह ह गृह राज्यमंत्री किशन रेड्डी ले करिन चर्चा
जय जोहार…. कोविड -19 सेति विश्वव्यापी लॉकडाउन के दौरान रूस म फंसे मेडिकल के पढ़ई करइया छत्तीसगढ़ के छात्र मन के वापसी बर पूर्व मुख्यमंत्री रमन सिंह ह गृह राज्यमंत्री किशन रेड्डी ले चर्चा करिन। केंद्रीय मंत्री ह पूर्व मुख्यमंत्री के आग्रह म कार्रवाई करे के आश्वासन दे हे।
पूर्व मुख्यमंत्री डॉ. रमन सिंह ह गृह राज्यमंत्री किशन रेड्डी ले चर्चा म छात्र मन के वापसी के संग ओखर दिल्ली ले रायपुर के यात्रा ल घलो सुगम बनाय के आग्रह करिन। वो हा कहिन कि अवइया सब्बो विद्यार्थी मन ल रायपुर म राज्य शासन के तरफ ले चिन्हित क्वारेंटाइन सेंटर म क्वारेंटाइन करे जाय।
केन्द्रीय गृह राज्यमंत्री किशन रेड्डी ले चर्चा के बाद पूर्व सीएम रमन सिंह ह केन्द्रीय गृह सचिव अजय भल्ला ले घलो ए विषय म चर्चा करिन अऊ आवश्यक कार्रवाई बर कहिस। मेडिकल छात्र-छात्रा मन ल रूस ले लाय के जानकारी ल पालक संघ के ओर ले राजेश अग्रवाल ह दिस।
