कोनो स्वर्ग ले कम नई हे रमदहा जलप्रपात, अद्भुत प्राकृतिक सुघ्घरता अउ शांत वातावरण बर प्रसिद्ध हे ए जगह

रायपुर। छत्तीसगढ़ के उत्तरी हिस्से म स्थित रमदहा जलप्रपात अपन अद्भुत प्राकृतिक सुघ्घरता अउ शांत वातावरण बर प्रसिद्ध हे। ए जलप्रपात मनेंद्रगढ़-चिरमिरी-भरतपुर जिला के जनकपुर ब्लॉक ले करीब 45 किलोमीटर के दूरी म स्थित हे। बहरासी वन परिक्षेत्र म बनास नदी के गोद म बसे ए स्थल हर साल लाखों सैलानी मन ल अपन ओर आकर्षित करत हे।

ए जलप्रपात ले लगभग 100 फीट के ऊँचाई ले गिरत पानी के मनमोहक दृश्य पर्यटक मन ल मंत्रमुग्ध कर देत हे। चारों कोती फइले घना जंगल, हरियाली, अउ शांत वातावरण रमदहा जलप्रपात एकठन मनमोहक पिकनिक स्थल हे। ठंड अउ बरसात के मौसम म एखर सुंदरता अपन चरम म रहिथे। तेज धारा, झरने के गूंज, अउ पानी के धुंध के नजारा प्रकृति प्रेमी मन बर कोनो स्वर्ग ले कम नई हे।

राज्य के राजधानी रायपुर ले लगभग 350 किलोमीटर के दूरी म स्थित ए जलप्रपात तक सड़क मार्ग ले आसानी ले पहुँचे जा सकथे। रमदहा के अनूठा सुंदरता केवल छत्तीसगढ़ के सैलानी मन तक सीमित नई हे, बल्कि मध्य प्रदेश औऱ उत्तर प्रदेश सहित अन्य राज्य ले घलो इहां पर्यटक बड़का संख्या म पहुँचथे। दिसंबर अउ जनवरी म ए स्थल पिकनिक मनाइया मन के प्रमुख केंद्र हे। हर दिन इहाँ अवइया सैलानी मन के संख्या बढ़त हे। रमदहा जलप्रपात न केवल पर्यटक मन बर  आकर्षण के केंद्र हे, बल्कि स्थानीय अर्थव्यवस्था बर घलो महत्वपूर्ण भूमिका निभात हे।