टिकट कटे के बाद दिल्ली ले रायपुर पहुंचिस बैस..जोरदार स्वागत

स्वागत ले खुश हो के बोलिस,  ये ही कमाया हव

रायपुर. लोकसभा चुनाव 2019 म छत्तीसगढ़ भाजपा ह बड़का प्रयोग करिस हे. मऊजूदा सबो सांसद मन के टिकट काटके नवां चेहरा मन ल मइदान म उतार दिस हे. टिकट कटे के बाद सबले जियादा असंतोष रायपुर सीट ले सात बेर सांसद रहे रमेश बैस के समर्थक मन म दिखाए रिहिस हे.

टिकट के घोसना के बाद रमेश बैस दिल्ली चले गे रिहिस हे. रमेश बैस सोमवार के दिल्ली ले रायपुर लउटिस त अलग ही नजारा देखे बर मिलिस. बड़का संख्या म रमेश बैस के समर्थक रायपुर एयरपोर्ट पहुंचिन अउ उंखर जोरदार स्वागत करे गिस. एमा रायपुर ले भाजपा प्रत्याशी सुनील सोनी घलो सामिल रिहिन हे.

रायपुर पहुंचे के बाद रमेश बैस ह कहिन, मैं राजनीतिक जीवन म कार्यकर्ता कमाए हव. टिकट कटे के कोई कसक नइए. पार्टी जे जवाबदारी दिही ओला पूरा कर हूं. टिकट मिले के बाद सुनील सोनी ह पहिली बेर मिलिस. रमेश बैस ह कहिन,
जीवन के अंत म रावण ह लक्ष्मण ल गुरु मंत्र देय रिहिस हे. मैं घलो सुनील सोनी ल गुरु मंत्र दूहूं.

सुनील सोनी के टिप्स देय के सवाल म रमेश बैस ह कहिन, जब राम रावण युद्ध होवत रिहिस हे, त रावण के आखिरी बेरा म राम ह लक्ष्मण ले कहिस के रावण के तीर जाके कुछु ज्ञान ले ले. जब बैस ले ये पूछे गिस के आज के परिस्थिति म रावण कउन हे, त उमन बगला झांके लगिस. अतना म सुनील सोनी ह कहिन, बैस जी मोर राम हे अउ मैं उंखर लक्ष्मण. अपन समर्थक मन के स्वागत ले अभिभूत नज़र आए रमेश बैस ह कहिन, मैं ह ये ही ल कमाय हव.