रामगढ़ महोत्सव के होईस आगाज, इहें गुफा म होए रिहिस महाकवि कालिदास के खंडकाव्य मेघदूत के रचना

विश्व के महत्वपूर्ण धरोहर, राम वनगमन परिपथ देखे बर जम्मो दुनिया आही छत्तीसगढ़ः अमरजीत भगत

‘‘पायो जी मैंने राम रतन धन पायो‘‘, अलग-अलग राग म श्री हेमराज के अद्भुत बांसुरी वादन

महाकवि कालिदास के रचना स्थली के संदर्भ म रामगढ़ के महत्व विषय म शोध करईया मन के वाचन

सरगुजा जिला के ऐतिहासिक रामगढ़ के पहचान कई रूप म होथे। राम वनगमन पर्यटन परिपथ म शामिल रामगढ़ म विश्व के सबले जुन्ना नाट्यशाला हे। इहां के पहाड़ी महाकवि कालिदास के खंडकाव्य मेघदूत के प्रेरणा हे। ए पुरखौती स्थल के महत्व ल उल्लेखित करे बर हर बछर रामगढ़ महोत्सव मनाए जाथे। इही कड़ी म खाद्य एवं संस्कृति मंत्री अमरजीत भगत के मुख्य आतिथ्य म 4 जून ले दो दिवसीय रामगढ़ महोत्सव के आगाज होईस।

ए बेरा म मंत्री अमरजीत भगत ह कहिन कि भगवान श्री राम के वनवास के बेरा म ऊंखर श्री चरण हमर छत्तीसगढ़ म पड़े रिहिस। हमार सौभाग्य हे कि ए ह भगवान श्री राम के ननिहाल घलो आए। माता कौशल्या के मइके आए। चंदखुरी म ऊंखर मंदिर बनाए गे हे। में ए भूमि ल प्रणाम करथों। रामगढ़ के महत्व सिरिफ धार्मिक नोहे ए ह विश्व के महत्वपूर्ण धरोहर के रूप म घलो हे। इहां के सीताबेंगरा अऊ जोगीमारा के गुफा के संग विश्व के सबले जुन्ना नाट्यशाला घलो हे। इहां महाकवि कालीदास के अद्भुत रचना मेघदूतम के रचना के स्थली हरे।

मुख्यमंत्री भूपेश बघेल ल धन्यवाद देत ओमन कहिन कि शासन कोती ले पुरखौती धरोहर मन ल संरक्षित अऊ स्थापित करे के उदिम करे जात हे। राम वनगमन पर्यटन पथ के विकसित होए ले पूरा दुनिया छत्तीसगढ़ ल देखे बर आही। ओमन रामायण के प्रसंग के घलो उल्लेख करत कहिन कि नदी पार करत-करत जब भगवान राम ले केंवट राजा के भेंट अऊ भगवान श्रीराम के छोटे भाई भरत के प्रति प्रेम के उल्लेख करिन। भगवान श्री राम ह वनवास के बेरा म जेन रद्दा ले छत्तीसगढ़ म प्रवेश करे रिहिन अऊ बेरा बीताए रिहिन ओ ह सीतामढ़ी के हरचौका ले शुरू होथे अऊ सुकमा तक जाथे। भगवान राम के कदम जिहां जिहां पड़े रिहिन ओला पर्यटन परिपथ के रूप म विकसित करे जात हे।

रामगढ़ महोत्सव के शुभारंभ अवसर म बांसुरी वादक श्री हेमराज ह अलग अलग राग म अपन मनमोहक प्रस्तुति दिस। ओखर कोती ले ‘‘पायो जी मैंने राम रतन धन पायो‘‘ के प्रस्तुति म दर्शक मन ताली बजाके संग दिस। अईसने स्थानीय कलाकार बबिता विश्वास ह घलो राम भक्ति ले जुड़े गीत प्रस्तुत कर दर्शक मन ल झूमे म मजबूर कर दिस। मंत्री अमरजीत भगत ह जम्मो कलाकार मन ल स्मृति चिन्ह भेंट कर ओमन ल सम्मानित करिन। एखर बाद राम वनगमन पर्यटन परिपथ अऊ महाकवि कालिदास के रचना स्थली के विशेष संदर्भ म रामगढ़ के महत्व विषय म शोध पत्र वाचन करे बर आमंत्रित शोधार्थि मन अपन शोध पत्र के वाचन कर जानकारी साझा करे गिस। अंत म कवि सम्मेलन के आयोजन करे गिस।