रायपुर । राष्ट्रपति रामनाथ कोविन्द ह छत्तीसगढ़ के बस्तर संभाग के मुख्यालय जगदलपुर तीर ग्राम डिमरापाल म स्वर्गीय बलिराम कश्यप स्मृति शासकीय मेडिकल कॉलेज के 500 बिस्तर वाले नवनिरमित अस्पताल भवन के लोकारपन करिन। उमन ए मउवका म छत्तीसगढ़ के 50 लाख मनखे मन ल निःशुल्क स्मार्ट फोन देहे बर राज्य सरकार के संचार क्रांति योजना के घलोक सुभारंभ करिन। मुख्यमंत्री डॉ. रमन सिंह ह मंच म प्रदेसवासी मन के तरफ ले राष्ट्रपति के अऊ उंखर धर्मपत्नी अउ देश के पहिली महिला श्रीमती सविता कोविंद के आत्मीय स्वागत करिन।
राष्ट्रपति रामनाथ कोविन्द ह कहिन के बस्तर के विकास के बिना छत्तीसगढ़ के विकास के अऊ छत्तीसगढ़ के विकास के बिना भारत के विकास के कल्पना नइ करे जा सकय। कोविन्द ह बस्तर संग पूरा छत्तीसगढ़ म आदिवासी मन के जीवन म बदलाव लाय बर मुख्यमंत्री डॉ. रमन सिंह के प्रतिबद्धता ल अनुकरणीय बतात एखर बर ओ मन ल अऊ राज्य सरकार के पूरा टीम ल अउ बस्तर के जनता ल बधाई देहे हें।
राष्ट्रपति कोविन्द गुरूवार को बस्तर संभाग के मुख्यालय जगदलपुर तीर ग्राम डिमरापाल म स्वर्गीय बलिराम कश्यप स्मृति मेडिकल कॉलेज बर लगभग 170 करोड़ रूपिया के लागत ले निरमित पांच सौ बिस्तर वाले विसाल अस्पताल भवन के लोकारपन करे के बाद जनसभा ल सम्बोधित करत रहिन। उमन कहिन ये अस्पताल भवन आधुनिक चिकित्सा विज्ञान के एक प्रमुख केन्द्र बनही। न केवल छत्तीसगढ़ राज्य बर भलुक पूरा देश बर चिकित्सा शिक्षा अऊ सेवा के एक उच्चतर मानक स्थापित करही।
राष्ट्रपति ह ए अवसर म राज्य के 50 लाख मनखे मन ल निःशुल्क स्मार्ट फोन दे बर राज्य सरकार के संचार क्रांति योजना के घलोक सुभारंभ करिन। जनसभा म एकर उल्लेख करत राष्ट्रपति ह कहिन – पूरा राज्य म 45 लाख महिला मन अऊ पांच लाख युवा मन ल स्मार्ट फोन देहे अऊ बड़े तादाद म मोबाइल टावर लगाय के राज्य सरकार के ये योजना ए क्षेत्र के विकास ल एक नवा आयाम देही। इहां के आदिवासी महिला मन अऊ युवा मोबाइल बैंकिंग के संगें-संग केन्द्र अऊ राज्य सरकार कोति ले मोबाइल फोन के जरिये दे जात आन सुविधा मन के लाभ उठा सकही। राष्ट्रपति ह कहिन – ए योजना म स्मार्ट फोन अऊ मोबाइल टावर के सुविधा मन ले कनेक्टिविटी के दृष्टि ले बस्तर अऊ बेंगलुरू के बीच के अंतर खतम कर देहे के क्षमता हे। मोला ये देखके बहुत खुशी होत हे के देश के ग्रामीण अऊ आदिवासी अंचल म घलोक धीरे-धीरे आधुनिक सुविधा पहुंचत हे।
राष्ट्रपति कोविन्द ह चिनहा स्वरूप कुछ हितग्राही मन ल मोबाइल फोन देके शुभकामना दीन। हम आप ल बता देवन के राष्ट्रपति के रूप म देश के बागडोर संभाले के एक साल सफलता ले पूरा होए म राष्ट्रपति ह, छत्तीसगढ़ के आदिवासी बहुल बस्तर संभाग के दू दिवसीय दौरा म आए रहिन। आज उंखर बस्तर यात्रा के दूसरा दिन रहिस। उमन कहिन बस्तर अऊ तीर तखार के क्षेत्र मन ले मैं भलीभांति परिचित हंव। करीबन पन्द्रा-सोला साल पहिली मैं वरिष्ठ आदिवासी नेता बलिराम कश्यप के आमंत्रण म बस्तर आए रहेंव। तब अऊ आज के बस्तर म जमीन – आसमान के अंतर आ गए हे। श्री कोविन्द ह कहिन – आज अऊ काल के दू दिन के प्रवास के बेरा मोला एक बदलत बस्तर देखे ल मिलीस, जहां आज विश्वविद्यालय, इंजीनियरिंग अऊ मेडिकल कॉलेज हे, अच्छा सड़क हे, इंटरनेट अऊ मोबाइल कनेक्टिविटि हे अऊ ऑप्टिकल फाइबर नेटवर्क हे। संगेच अब इहां रेल अऊ नियमित हवाई सेवा घलोक हो गए हे। ए उपलब्धि मन के पीछू जऊन दृष्टि, संकल्प अऊ करमठता हे अउ आदिवासी भाई-बहिनी मन के जीवन म बदलाव लाय बर जऊन प्रतिबद्धता हे, वो अनुकरणीय हे। उमन दंतेवाड़ा जिला के ग्राम हीरानारा के अपन प्रवास अऊ उहां महिला स्व-सहायता समूह मन अऊ किसान समूह मन के एकीकृत खेती प्रनाली, दंतेश्वरी ई-रिक्सा सेवा, दंतेवाड़ा के एजुकेसन सिटी के आस्था विद्या मंदिर अऊ सझम विद्यालय के लइका मन के प्रतिभा के घलोक आज के आमसभा म उल्लेख करत उंखर तारीफ करिन।