रायपुर। राजधानी के देवपुरी इलाका म कल एक अज्ञात वाहन ह मोटरसाइकिल सवार तीन युवक मन ल टक्कर मार दिस। जेमा तीनों गंभीर रूप ले घायल हो गे। वोमन ल इलाज बर एक निजी अस्पताल म भरती करे गिस, जिहां उपचार के दउरान दू झन युवक के मउत हो गे। उंहे एक घायल युवक के उपचार चलत हे।
बतात हे कि आमापारा के रहवईया रवीश सारथी ह अपन दोस्त अमन सारथी अउ मेघम के संग एक्के बाइक म बईठक के नवा रायपुर घूमे बर गे रिहीस। कल संझाकून वोमन ह वापस लउटत रहीस तभे सत्संग भवन देवपुरी के पास एक तेज रफ्तार अज्ञात वाहन ह बाइक ल टक्कर मार दिस।
ये हादसा म गम्भीर रूप ले घायल तीनों युवक ल राजेंद्र नगर के एक निजी अस्पताल म भरती करे गिस, जिहां उपचार के दउरान रवीश सारथी अउ अमन सारथी ह देर रात दम तोड़ दिस। मेघम के अस्पताल म उपचार चलत हे। टिकरापारा पुलिस ह अज्ञात वाहन चालक के खिलाफ अपराध दर्ज कर कर मामला के जांच म जुटिन हे।
