Raipur : राज्य के सबो रीपा म भाभा एटॉमिक रिसर्च सेंटर के सहयोग ले स्थापित होही ग्रामीण तकनीकी

जय जोहार। (Raipur) छत्तीसगढ़ राज्य के गौठान म स्थापित ग्रामीण औद्योगिक केन्द्र म काम करइया ग्रामीण युवा उद्यमी के सपना ल एक ठीन नवा आयाम मिलइया हे । ग्रामीण औद्योगिक केन्द्र यानि रीपा म अब भाभा एटॉमिक रिसर्च सेंटर (बार्क) मुम्बई के सहयोग ले छत्तीसगढ़ के सबो रीपा सेंटर म ग्रामीण तकनीक के प्रदर्सन अउ प्रसिक्षण दे बर ग्रामीण तकनीकी केन्द्र स्थापित करे जाही ।

ए केन्द्रों म 72 ठीन ले जादा ग्रामीण अर्थव्यवस्था पर आधारित उद्यम तकनीक के प्रसिक्षण युवा ल दे जाही। बार्क डहार ले इंहा मास्टर ट्रेनर घलो तईयार करे जाही । बार्क के अधिकारी ह छत्तीसगढ़ म ग्रामीण अर्थव्यवस्था अउ रोजगार के बेहतर अवसर उपलब्ध कराय बर सरकार डहार ले करे जावत परयास के सराहना करीन अउ रीपा म ग्रामीण तकनीकी केन्द्र के स्थापना म सहयोग दे के सहमति दीन ।

उल्लेखनीय हे कि मुख्यमंत्री श्री बघेल के मंसा के अनुरूप राज्य के 300 गौठान म रूरल इंडस्ट्रियल पार्क के निर्माण कराए जावत हे । एखर बर राज्य सासन डहार ले 300 करोड़ रुपिया के मंजूरी दे गेहे। कई रीपा के निर्माण पूरा हो गेहे अउ उंहा विभिन्न ग्रामीण उद्यम संचालित करे जावत हे । ग्रामीण तकनीकी केन्द्र म युवा ल विभिन्न रोजगार-व्यवसाय के प्रसिक्षण, फल सब्जी अउ लघु वनोपज के उत्पाद तईयार करे के प्रसिक्षण घलो दे जाही ।

राज्य योजना आयोग के उपाध्यक्ष अजय सिंह के अध्यक्षता म होइन योजना आयोग के बइठक म रीपा म ग्रामीण तकनीकी केन्द्र के स्थापना अउ गोबर ले विद्युत उत्पादन के आधुनिक तकनीक अउ इकाई के विस्तार ल लेके सार्थक चर्चा होए हे । बइठक म ये घलो निर्णय ले गेहे कि रायपुर के इंदिरा गांधी कृषि विश्वविद्यालय म मुख्य ग्रामीण तकनीकी केन्द्र स्थापित करे जाही ।