देसी औषधि ले ग्रामीण महिला मन ह तैयार करत हे सेनिटाइजर, नेहरू युवा केंद्र ह देवत हे प्रशिक्षण
जय जोहार…. कोरोना महामारी के संक्रमण के ए दौर म मास्क अऊ सेनिटाइजर के उपयोग म वृद्धि होय हे। जेखर ले एखर मांग ह तेजी ले बाढ़ गे हे। बाजार म सेनिटाइजर के बढ़त कीमत अऊ एखर मारामारी ल देखत हुये नेहरू युवा केंद्र ह देसी औषधि के माध्यम ले सेनिटाजइजर तैयार करे के तरीका ल इजाद करे हे। नेहरू युवा केंद्र रायपुर, युवा कार्यक्रम अऊ खेल मंत्रालय भारत सरकार के मेंटर युवा मंडल, पंडित सुंदरलाल शर्मा एजुकेशनल अकादमी ह पारागांव, लखना, मोहंदी आदि ग्राम म सेनिटाइजर बनाये के प्रशिक्षण 50 ले ज्यादा युवती मन ल दिस।
जिला युवा समन्वयक नेहरू युवा केंद्र रायपुर के अर्पित तिवारी ह ए प्रशिक्षण के उद्देश्य बतात हुये कहिन कि ए प्रशिक्षण के माध्यम ले लोगन मन तक सेनिटाइजर जैसा आवश्यक वस्तु ह पहुंच सके। संगेसंग स्वास्थ्य अऊ स्वच्छता के बारे म घलो जागरूक हो सके। वो हा बताइस ए भयावह समय म सेनिटाइजर जैसा आवश्यक वस्तु ह आम जनता तक उपलब्ध नई हो पात हे। अईसे स्थिति म लोगन मन म संक्रमण के खतरा अऊ बाढ़ जात हे। ए प्रशिक्षण ले न केवल आम जनता तक सेनिटाइजर पहुंचही बल्कि रोजगार के नवा अवसर घलो मिलही। वो हा बताइस कि अभी रायपुर, गरियाबंद, बलौदाबाजार अऊ धमतरी जिला म करीब 20 लीटर सेनिटाइजर ल 1000 ले अधिक लोगन मन ल वितरित करे गे हे।
