सायबर सुरक्छा घलो हे आज के बड़ चुनवती : डॉ. रमन सिंह

रायपुर । मुख्यमंत्री डॉ. रमन सिंह ह कहिन के 21वीं सदी ह कम्प्यूटर अउ इंटरनेट के युग हे। सबो काम कम्प्यूटरीकृत होवत जात हे। इंटरनेट कनेक्टिविटी गांव-गांव म पहुंच गे हे। सूचना प्रौद्योगिकी के उपयोग ह अबड़ अकन काम मन ल आसान बना दे हे। येखरे संग सायबर सुरक्छा घलो आज के बड़ चुनवती हे। येमा गंभीरता ले धियान देय के जरुरत हे।
मुख्यमंत्री इहां इंदिरा गांधी कृषि विस्वविद्यालय परिसर के स्वामी विवेकानंद सभागृह म ’मंथन: सायबर सुरक्षा’ बिसय म दू दिन के राष्ट्रीय सम्मेलन के उद्घाटन सत्र ल संबोधित करत रहिन हे। सम्मेलन के आयोजन राष्ट्रीय सुरक्छा जागरन मंच को छत्तीसगढ़ इकाई ह करे हवय।
मुख्यमंत्री ह कहिन के ई-ट्रांजेक्शन, ई-प्रोक्योरमेंट, सामाजिक सुरक्छा पेंशन अउ अनुदान सहायता के भुगतान आदि के कारय म सूचना प्रौद्योगिकी के उपयोग होय ले काफी आसान अउ पारदरसी हो गेहे। अपराधी मन के पहचान ले ये तकनीक के उपयोग से काफी आसान हो गे हे। सूचना प्रौद्योगिकी एक ओर त काफी उपयोगी हे, दूसर ओर येखर गलत उपयोग ले अबेवस्था घलो हो सकत हे। वाट्स एप ग्रुप म गलत संदेश ले भ्रम के हालत बन जाथे। सायबर अपराध घलो आज बढ़त हे। ये परिदृश्य म ये आयोजन काफी महत्वपूरन बन जात हे ।
उमन कहिन के सम्मेलन म सामिल होवइया सायबर सुरक्छा बिसय के विशेसज्ञ, पुलिस अधिकारी अउ युवा दू दिन तक ये गंभीर बिसय म विचार-विमरस करही, जेखर निस्करस सायबर सुरक्छा के दृष्टि ले काफी उपयोगी साबित होही।
—