सबो शासकीय कार्यालय म चलही सेनिटाइजेशन अभियान, मुख्य सचिव ह जारी करिस निर्देश
जय जोहार…. मुख्यमंत्री भूपेश बघेल ह कोरोना वायरस के संक्रमण के रोकथाम बर प्रदेश के राजधानी रायपुर स्थित राज्य स्तरीय कार्यालय समेत जिला अऊ मैदानी क्षेत्र म स्थित सबो शासकीय कार्यालय मन म समुचित सेनिटाइजेशन अभियान चला के साफ-सफाई रखे के निर्देश दे हे। ए संबंध म मुख्य सचिव आरपी मंडल ह प्रदेश के सबो कलेक्टर, पुलिस अधीक्षक, जिला पंचायत के मुख्य कार्यपालन अधिकारी अऊ वन मंडलाधिकारी मन ल पत्र जारी करे हे। एमा अपन अधीनस्थ कार्यालय मन म अभियान चला के सेनिटाइजेशन करे के निर्देश दे हे।
मुख्य सचिव ह कहिन कि कोराना वायरस के बढ़त संक्रमण के चलत लगाए गिस देशव्यापी लॉकडाउन के फलस्वरूप सबो शासकीय कार्यालय म कार्य संपादित नई होवत हे। अवइया दिनो म लॉकडाउन समाप्त होय म सबो कार्यालय म कार्य ह शुरू करे जाही। एखर चलत कार्यालय मन म आम नागरिक मन के आना अऊ जाना घलो होही। चूंकि अभी वैश्विक महामारी के प्रकोप कम होय के संभावना ल व्यक्त नई करे जा सकत हे। अईसे स्थिति म आम जन, अधिकारी अऊ कर्मचारी मन के व्यापक सुरक्षा के दृष्टि ले सबो जिला, तहसील, जिला पंचायत, जनपद, ग्राम पंचायत के कार्यालय समेत अन्य मैदानी कार्यालय मन म सेनटाइजेशन बर अभियान चला के कार्यालय के साफ-सफाई अऊ ओखर सेनिटाइजेशन ल प्राथमिकता ले कराना सुनिश्चित करे जाए।
मुख्य सचिव ह ए अभियान के तहत सबो शासकीय कार्यालय म सेनिटाइजेशन, नियमित साफ-सफाई, रंग-रोगन, हाथ धोने बर हैंडवाश आदि के व्यवस्था, कार्यालय मन म आनवश्यक रूप ले रखे सामग्री अऊ कबाड़ ल राइट ऑफ करे के संगेसंग कार्यालय मन म कोरोना वायरस के रोकथाम अऊ नियंत्रण बर समुचित व्यवस्था करे के निर्देश दे हे।
