chhattisgarh म स्कूली लईका मन ह अगले कक्षा म होही प्रमोट, निर्देश हो गे जारी, पढ़व पूरा खबर

जय जोहार…. (chhattisgarh) प्रदेश म स्कूली लईका मन ल अगले कक्षा म प्रमोट करे के दिशा-निर्देश जारी कर दे गे हे। ए संबंध म स्कूल शिक्षा विभाग ह आदेश जारी कर दे हे। शिक्षा विभाग ह सबो जिला शिक्षा अधिकारी अऊ संयुक्त संचालक ल निर्देश दे हे कि पढ़ई तुंहर द्वार अऊ आनलाइन-आफलाइन कक्षा ले लईका मन के एसेसमेंट के बाद ओ मन ल अगले कक्षा म प्रमोट करे के पूर्व के प्रक्रिया के अनुसरण करे।

डीपीआई जितेंद्र शुक्ला ह अपन आदेश म बताईस कि छत्तीसगढ़ (chhattisgarh) म पहिले ले ही पहली ले आठवी कक्षा म लईका मन ल फेल नई करे के निर्देश लागू हे। राष्ट्रीय शिक्षा नीति म घलो परीक्षा के आधार म पिछिले कक्षा म लईका मन ल नई रोके के निर्देश जारी हे। अइसे म ए साल घलो लईका मन ल सामान्य रूप ले अवइया सत्र म अगले कक्षा बर प्रवेश दिए जाही।

आदेश म कहे गे हे कि प्रदेश (chhattisgarh) के सबो विद्यालय म लईका मन के अकादमिक उपलब्धि के सतत मूल्यांकन करे जावत हे। ओखर आधार म सबो लईका मन के आवश्यक शिक्षण दे के व्यवस्था करे जात हे। ए साल घलो राज्य म पहिली ले आठवी कक्षा के लईका मन बर इही नीति लागू रही।