ट्रक के चपेट म आए ले स्कूटी सवार युवती के मउत, आक्रोशित लोगन मन करिन थाना के घेराव

रायपुर। राजधानी म डीडी नगर थाना के आघू म एक तेज रफ्तार ट्रक के चपेट म आए ले स्कूटी सवार युवती के मौका म ही मउत हो गे। मृतका रूचि गौर ह अमलेश्वर म राहत रिहिस। हादसा के बाद आक्रोशित लोगन मन ह पार्षद के संग डीडी नगर थाना के घेराव कर दे रिहिन। पुलिस ह ट्रक ल जब्त कर ड्राइवर महेश कुमार ल हिरासत म लिस हे।

जानकारी के मुताबिक रूचि गौर ह अमलेश्वर डाहर ले आवत रिहिस। डीडी नगर थाना के आघू म एक तेज रफ्तार ट्रक ह बाजू ले गुजरत रिहिस, इही दउरान रूचि के गाड़ी ह अनियंत्रित हो गे अउ वो ह ट्रक के पाछू चक्का के चपेट म आगे। चक्का के बीच म फंसे के कारण वो ह दूर तक घिसटात रिहिस, जेकर सती मौका म ही उंखर मउत हो गे। हादसा के बाद सड़क म जाम ल गे। आक्रोशित लोगन म ह इलाका के पार्षद के नेतृत्व म थाना के घेराव करिस अउ सड़क म भारी वाहन ल प्रतिबंध लगाए के मांग करत चेतावनी दिस हे कि दू दिन म मांग पूरा नई होही त चक्काजाम करे जाही।