अभी तक सुरक्षित माने जात रहिस बिलासपुर म कोरोना पाजिटिव के दूसर मरीज मिलिस

जय जोहार बिलासपुर…. प्रदेश म कोरोना वायरस ले संक्रमित लोग मन के संख्या ह कम होय के बजाए बढ़त जात हे। कोरोना के हाट स्पॉट बने कटघोरा म आज फेर 4 संक्रमित पाए गिस। जबकि अभी तक सुरक्षित बिलासपुर के खपरगंज मोहल्ला म एक महिला घलो संक्रमित मिलिस, जेन कुछु समय पहिली मक्का ले लहुटे रहिस। सबो संक्रमित ल एम्स भेजे के तैयारी करे जात हे।

बिलासपुर म कोरोना पाजिटिव होय के ए दूसर मामला हे। बिलासपुर खपरगंज जूनी लाइन म एक संक्रमित महिला के मिले ले चिंता बढ़ गे हे. हालांकि मक्का ले लहुटे ए महिला ल ओखर घर कई दिन पहिली क्वारेंटाइन करे जा चुके हे. आज ओखर संक्रमित होय के सूचना म ओला अऊ कटघोरा के चार नवा संक्रमित ल एम्स भेजे के तैयारी करे जात हे।

बिलासपुर म एक महिला के संक्रमित पाए जाए के बाद शहर के कुछु चिन्हांकित वार्ड मन म स्वास्थ्य विभाग के अधिकारी, कर्मचारी अऊ मितानिन ह सक्रिय होके जांच पड़ताल म लग चुके हे। जेमा स्वास्थ्य कर्मी मन के संगेसंग विधायक शैलेष पांडेय अऊ स्वास्थ्य मंत्री के प्रतिनिधि पंकज सिंह घलो रहिस।