दिव्यांग दामिनी, सुनीता अऊ कृतिका के होइस सम्मान

सेन समाज के महिला महासम्मेलन म सामिल होइन मुख्यमंत्री

रायपुर. मुख्यमंत्री भूपेश बघेल रायपुर के साइंस कॉलेज परिसर स्थित पंडित दीनदयाल उपाध्याय ऑडिटोरियम म छत्तीसगढ़ सर्वसेन समाज के प्रदेश स्तरीय महिला महासम्मेलन म सामिल होइन. उमन सेन समाज के महिला मन ल पहली पइत सम्मेलन के आयोजन करे बर बधाई दीन अऊ कहिन के छत्तीसगढ़ के बहिनी-बेटी के ससक्त होए ले बढ़के कोनो दुसर खुसी नइ हो सकय. उमन सेन समाज के मांग म महिला मन के ससक्तिकरन बर समाजिक भवन बनाए के घोसना करिन. मुख्यमंत्री ह कहिन के रायपुर के महापौर ए सामाजिक भवन के निर्माण कराहीं, मैं उंखर तरफ ले घोसना करत हंव.

मुख्यमंत्री बघेल ह कहिन के, सेन समाज ह कई बछर ले समाज म अपन विश्वास अर्जित करे हे वो आज घलोक कायम हे. उमन कहिन के समाज के कई वर्ग धोबी-नाई धीरे-धीरे अपन पारंपरिक अऊ पैतृक व्यवसाय ले दूर होत जात हे. ए पारंपरिक व्यवसाय मन के विकास अऊ उत्थान बर सरकार हर संभव सहयोग करही. उमन सेन समाज के महिला मन बर रोजगार अऊ प्रसिक्षन केन्द्र के मांग उपर सहानुभूतिपूर्वक विचार करके पूरा करे के आश्वासन दीन। बघेल ह ए अवसर म समाज म उत्कृष्ट काम करइया अऊ प्रतिभावान महिला मन ल सम्मानित घलोक करिन.

एमा रायपुर के दिव्यांग दामिनी घलव हे, दामिनी के दुनों हाथ नइ हे अऊ ओ ह पांव ले पेंटिंग करथे अऊ लिखथे. मुख्यमंत्री ह कोण्डागांव म सेलून चलइया महिला सुनीता सेन अऊ आठवीं म 99 प्रतिसत अंक लवइया रायपुर के कृतिका संग समाज के बहुत अकन महिला मन ल स्मृति चिन्ह अऊ सॉल देके सम्मानित करिन.

सम्मेलन म संस्कृति मंत्री ताम्रध्वज साहू ह महिला मन ल संबोधित करत कहिन के, संगठन के माध्यम ले बड़का काम घलोक सहजता ले हो जाथे, ए खातिर समाजिक संगठन मन ल मजबूत करना जरूरी हे. उमन सबो ले सामाजिक सद्भाव अऊ एकता के भावना बनाए रखे बर कहिन. उमन कहिन के, प्रदेस के मुख्यमंत्री किसान के बेटा ये जेखर कथनी अऊ करनी म भेद नइए। उमन जनघोसनापत्र म करे गे सबो वादा मन ल सरकार कोति ले पूरा करे के आश्वासन दीन.

छत्तीसगढ़ सर्वसेन समाज के महिला विंग के प्रदेशाध्यक्ष मोना सेन ह बताइस के, घर के चार दीवारी ले बाहिर के दुनिया ले अनजान महिला मन ल आत्मनिभर बनाए अऊ महिला मन के प्रतिभा मन ले परिचित कराए बर पहली पइत प्रदेसस्तर म कार्यक्रम आयोजित करे गए हे. ए अवसर म महापौर प्रमोद दुबे संग बड़ संख्या म सेन समाज के महिला मन अऊ नागरिक उपस्थित रहिन.