मुख्यमंत्री ल किसान लक्ष्मी साय ह भेंट करिन शाही लीची

जशपुर/रायपुर। मुख्यमंत्री डॉ. रमन सिंह ह आज दुपहरी विकास यात्रा के दउरान जशपुर जिला के कांसाबेल म आयोजित विकास प्रदर्सनी म जब उद्यानिकी अउ प्रक्षेत्र वानिकी बेभाग के स्टाल म पहुंचिन, त उहां मवजूद ग्राम सूजीबहार के किसान लक्ष्मी साय ह उमन ल शाही लीची ले भरे बास्केट उपहार के रूप म दिस। छत्तीसगढ़ के जशपुर जिला के प्राकृतिक परिवेस ल लीची के खेती बर काफी अनुकूल पाय गेहे। राज्य सरकार के उद्यानिकी बेभाग ह उहां लीची उत्पादन ल बढ़ावा देय बर पीछु के कुछु बरिस म अबड़ प्रयास करिस हे। बेभाग ह येखर बर किसान मन ल प्रोत्साहित घलो करत हवय। ये सेती ये जिला अब लीची के खेती के मामला म दूर-दूर तक प्रसिद्ध होगे हे।
जिला म ये स्वादिष्ट फल के भरपूर उत्पादन होवक हे। मुख्यमंत्री ह विकास यात्रा के दउरान कांसाबेल म आज येखर खेती के बारे म प्रदर्सनी म किसान अउ अधिकारी मन ले बातचीत करिन। उमन ह किसान मन ल उद्यानिकी बेभाग म संचालित योजना मन के अधिक ले अधिक लाभ लेय के अपील करिन। ये बखत म केन्द्रीय इस्पात राज्य मंत्री अउ रायगढ़ लोकसभा सांसद विष्णुदेव साय, प्रदेश के गृह मंत्री रामसेवक पैकरा अउ दूसर वरिष्ठ जनप्रतिनिधि घलो उपस्थित रहिन हे।