शेखर सोनी के मदद करे बर आघु आइस छालीवुड

रायपुर। छत्तीसगढ़ी फिलिम के हीरो शेखर सोनी के मदद बर छालीबुड के कलाकार मन आघू आइन। शुक्रवार के रतिहा म आयोजित छालीबुड अवार्ड फंक्शन म शेखर सोनी के ब्लड केंसर पीड़ित ढाई बठर के गौरांश सोनी के सहायता बर छालीवुड के कलाकार अउ फिलिमकार मन स्वेच्छा ले सत्ताईस हज़ार तीन सौ इन्कावन रुपया जोड़िन अउ शेखर सोनी ल सउपिस।
फिल्म “तोर मोर यारी” के प्रोड्यूसर अउ हीरो अजय त्रिपाठी ने ग्यारह हजार नकद प्रदान करिन। कला साहित्य के वैभव ह पांच हज़ार सहयोग राशि प्रदान करिन। दीपक बावनकर ह पांच हज़ार के सहयोग राशि प्रदान करिन। येखर संग योगेश अग्रवाल ह इन्कावान हज़ार के सहयोग राशि प्रदान करे के घोसना करिन हे। येखर अलावा सतीश जैन ,जेठू साहू , मनोज वर्मा, पद्मश्री अनुज शर्मा , छमानिधि मिश्रा समेत अबड़ अकन फिल्मकार मन ह सहयोग राशि देय के घोसना करिन हे। राशि एकत्रित करे म महावीर चौहान अउ भीखम साव ह मदद करिन। ये सबो दानदाता मन ल सोनी परिवार के ओर से बहुत- बहुत धन्यवाद देवत हुए आभार व्यक्त करे गिस।